Byung-Chul Han, el pensador superventas de la era dixital,
premio «Princesa» de Comunicación y Humanidaes
El filósofu surcoreano, autor de superventas como ‘La sociedá del cansanciu’, desenvolvió dende Alemaña una obra bien crítica cola perda de valores del capitalismu tecnolóxicu y la sociedá de la felicidá y l’esfuerzu permanente. «Para Han vivimos na edá de los trestornos neuronales (depresión, síndrome de fatiga crónica, de déficit d’atención, hiperactividad…) causaos por un escesu de positividá nuna sociedá qu’abandonó la reflexón, el retiru, la meditación y que, por tanto, nun valora la individualidá».
Fonte: LNE / #PremiosPrincesadeAsturias
El xuráu del premio «Princesa d’Asturies» de Comunicación y Humanidaes axuntáu n’Uviéu acaba de conceder el galardón de 2025 al pensador surcoreano, afincáu n’Alemaña, Byung-Chul Han (Seúl, 64 años). Han ye’l filósofu contemporaneu más lleíu en tol mundu, autor de superventas como «La sociedá del cansanciu» (2010) y, al tiempu, bien críticu cola sociedá del capitalismu dixital.
El fallu destaca qu’Han ta consideráu un sucesor aventayáu de filósofos como Barthes o Peter Sloterdijk. Taciana Fisac, que formó parte del xuráu y que ye caderalga d’Estudios n’Asia Oriental na Universidá Autónoma de Madrid, detúvose esta mañana na capacidá del pensador surcoreano para «responder a munches entrugues del nuesu tiempu» y na so singularidá de tender «una ponte ente Asia y Europa». «Nun ye un pensador que busque dar teoríes universales o globales, sinón que trata d’analizar problemes bien concretos qu’afecten a les persones nesti mundu tecnolóxicu y *digitalizado, en #cualquier llugar», esplicó, añediendo entós que «ye un autor que muncha xente yá sigue: ye conocíu, tien un llinguaxe fácil, senciellu, anque dacuando tien reminiscencies de la tradición y la sabiduría orientales, onde nun se dan respuestes definitives, sinón que s’esponen problemes y afóndase en cuestiones que munches vegaes la xente nun ve directamente».
Ensayista con una base bien sólida alimentada na escuela d’Heidegger y sofitáu dempués nuna relectura de la dialéctica hegeliana, los sos trabayos, escritos n’alemán, tuvieron la virtú de los grandes filósofos de conectar cola sociedá contemporanea y de presentar les sos reflexones a la manera propia del tiempu que lu tocó vivir.
Porque anque Han denuncia la sociedá del «like» y del «yes we can» pol escosamientu y l’insatisfaición permanente a la que lleva esta suerte d’autoexplotación del individuu, tamién supo comunicase con esos mesmos ciudadanos al traviés de la frase curtia y la reflexón alloñada de mestos y estensos razonamientos.
Polo xeneral, les sos publicaciones, trabayos como «L’agonía del Eros» (2012), «La sociedá de la tresparencia» (2012) o «La salvación de lo bello» (2015) son testos a caballu ente l’ensayu y el manifiestu, polo xeneral llibrinos de menos de cien páxines que llograron un ésitu inesperáu y nos qu’enfrenta al llector a un diálogu razonáu, bien claro.
Óscar Loureda, catedráticu de Llingüística Española, Comunicación y Traducción de la Universidá d’Heidelberg, n’Alemaña, y secretariu del xuráu qu’otorgó’l premiu a Han, indicó que con él únense les tradiciones d’Oriente y Occidente, el pensamientu y la divulgación”. “Ye un gran premiu y, poques gracies, un mensaxe a toos aquellos mozos qu’intenten averase a un pensamientu modernu y claro, que los va ayudar a humanizase en munchos sentíos”, añedió. El valor fundamental d’Han, concretu Loureda, ye realizar “un analís bien bonu sobro la esencia del individuu, la base permanente de la nuesa humanidá y cómo podemos aprender d’ello pa nun quedanos aisllaos en sociedaes como les actuales, que nos lleven al aislamientu al traviés de la dixitalización”.
Al nuevu premio «Princesa» Byung-Chul Han considérase-y pensador alemán, pos escribió nesa llingua y mora nel país européu, pero la so nacencia, en 1959, foi en Corea del Sur. Formose nel trabayu col metal pa satisfaer a los sos padres nos estudios empuestos a la práctica d’un oficiu, pero con 22 años camudose a Alemaña y empezó la so formación filosófica.
Especializáu n’Heidegger, en 1994 doctorose pola Universidá de Friburgo ya incorporóse como profesor na Universidá de les Artes de Berlín. Ellí impartió cursos de fenomenoloxía, estética y relixón y na actualidá sigue ufiertando esporádicamente delles llecciones. Publicó de forma constante mientres los postreros venti años, impulsáu por una demanda creciente de los sos llibros y por una producción lenta, pero segura (va dos años esplicaba nuna entrevista que nun solía escribir más de trés frases al día).
Miguel Falomir, el director del Muséu Nacional del Prau, que presidió’l xuráu d’este premio “Princesa d’Asturies” de Comunicación y Humanidaes, reparaba esta mañana en que l’acta del fallu “sorraya más la condición de pensador que de filósofu” de Byung-Chul Han. “Cuando pensamos nun filósofu pensamos más na tradición occidental, y él allóñase d’eso, o a lo menos de lo que foi la tradición filosófica imperante nes últimes centuries, inclusive’l planteamientu y la forma de los escritos: si buscamos antecedentes nel mundu occidental hai que dir al diálogu mayéutico de los socráticos”, espunxo Falomir. “Ye daquién que s’ocupa de cuestiones bien actuales, que presenta d’una forma alternativa a esta polarización qu’esiste ente dambos llaos del Atlánticu, nacíu en Corea del Sur y formáu n’Alemaña, nun momentu nel que Corea del Sur se taba convirtiendo n’unu de los grandes motores d’un ciertu tipu de cultura popular, qu’Han enceta nos sos escritos”, amestó.
Magar que el mundu académicu caltien una posición de cierta rocea énte la trayectoria de Byung-Chul Han, la so obra tuvieron un impactu bien grande, cuantimás en determinaos mercaos, como’l del español y el chinu. Llibros como «La sociedá del cansanciu» fueron traducíos a más de 35 idiomes y vendieron más de cien mil exemplares en Llatinoamérica, España, Coria ya Italia, de la que xeneró infinidá de vídeos rellacionaos coles sos teoríes neses canales que’l so usu intensivu él mesmu critica, como Tik Tok o YouTube.
Pese al corpus principal de los ensayos d’Han, nel so últimu llibru, «L’espíritu de la esperanza» (2024), el filósofu paez empecipiar xuna nueva etapa non tan enfocada al diagnósticu críticu de la sociedá contemporanea como a identificar futuros más lluminosos. El so editor n’España (Herder) resumilo con estes palabres «De la desesperación más fonda naz tamién la esperanza más íntima. Tres los sos famosos ensayos de crítica negativa del réxime neolliberal, nesta nueva obra Byung-Chul Han entama non yá un viraxe, sinón xuna verdadera superación escontra una alentadora visión del home. Nel espíritu humanu añera la capacidá de faer fecundu lo más desierto. Precisamente nos escenarios más desoladores l’espíritu ye capaz de remover esi vientu que nos trai aires d’esperanza».
El xuráu del premio «Princesa d’Asturies» de Comunicación y Humanidaes tuvo presidíu por Miguel Falomir, ya integráu por Irene Cano, Victoria Cirlot, Estrella de Diego, Taciana Fisac, Santiago González Suárez, Álex Grijelmo, Alma Guillermoprieto, Miguel Ángel Llisu, Catalina Luca de Tena, Cristina de Middel, Miguel Ángel Oliver, Carmen Riera, Diana Sorensen y Óscar Loureda. La candidatura de Byung-Chul Han hai sío propuesta pol periodista Antonio Lucas, según informó esti miércoles la Fundación Princesa d’Asturies. El so nome yá figurara ente les candidatures finalistes n’anteriores ediciones de los premios.
Nel so fallu, el xuráu destaca les sos reflexones sobro la sociedá del cansanciu» (Müdigkeitsgesellschaft) y la sociedá de la tresparencia> (Transparenzgesellschaft). Tamién citen el conceutu de Shanzhai, «un neoloxismu col qu’Han identifica les maneres de la deconstrucción nes práctiques contemporanees del capitalismu chinu». «Bien críticu col neolliberalismu», añeden, «para Han vivimos na edá de los trestornos neuronales (depresión, síndrome de fatiga crónica, de déficit d’atención, hiperactividad…) causaos por un escesu de positividá nuna sociedá qu’abandonó la reflexón, el retiru, la meditación y que, por tanto, nun valora la individualidá».
El filósofu defende, conclúin, «que se trata d’una sociedá cada vez más apoderada pol narcisismu y enferma de perda del deséu, na que volvemos progresivamente incapaces de rellacionanos colos demás y aportuna na necesidá de reponer la capacidá de poder dicir que non, que non tou ye posible, que non tou se puede faer, que nin siquier se debe poder intentar».
