- Radiotelevisión del Principado de Asturias
- Graciela Iturbide: wiki / web / El País Cultura /
La fotógrafa mexicana Graciela Iturbide, unu de los grandes nomes de la fotografía artística d’inspiración social y cultural, foi galardonada esti vienres col Premiu Princesa d’Asturies de les Artes 2025. En palabres de la ganadora, la fotografía ye “un ritual”. “Salir cola cámara, reparar, fotografiar los aspeutos más mitolóxicos de les persones, depués dir a la escuridá y escoyer les imaxes más simbóliques”.
El xuráu empondera la mirada «fonda, respetuosa y evocadora» de Graciela Iturbide. Considerada una de les más importantes y influyentes fotógrafes d’América Llatina, Iturbide (Ciudá de Méxicu, 1942) concibe’l so trabayu como una manera de conocer, pescudar y investigar cultures con obres, cuasi siempres en blanco y negro, qu’amuesen la fraxilidá de les tradiciones ancestrales y la so difícil subsistencia, la interacción ente natura y cultura o la dimensión simbólica de paisaxe y oxetos atopaos al azar.
A lo llargo de más de mediu sieglu de trayectoria retrató a pueblos indíxenes de Méxicu, Panamá, Madagascar o Cuba y creó una obra intensa y singular, fundamental pa entender la evolución de la fotografía en Méxicu y nel restu d’América Llatina.
Iturbide suma más de mediu sieglu de trayectoria d‘una poderosa fotografía en blancu y negru, na que s’afitó de manera especial nes comunidaes indíxenes mexicanes, siempres dende’l respetu, con dignidá. Precisamente, la so serie sobro les muyeres de Juchitán, nel Estáu d’Oaxaca, coles que convivió llargu tiempu, ye’l so trabayu más celebráu. Pol so oxetivu pasaron tamién dos de les sos obsesiones, les aves y les plantes.
