Esperamos un día veraniegu con temperatures que van superar los 25 ºC na mayor parte d’Asturies y, nes zones más templaes de la rexón, podríen llegar a los 30 ºC. Asina tou, vamos amanecer con cielos nublos en gran parte del Principáu salvu nel sur. Conforme vaiga avanzando la mañana, y especialmente a partir del mediudía, van abrise grandes claros hasta que los cielos queden prácticamente estenos. A lo llargo de la tarde van apaecer nubes d’evolución diurna que van poder dexar dellos bastios tormentosos que van ser más frecuentes nel cordal y onde cabi la posibilidá de que vengan acompañaos de xarazo.
De toes formes, l’Axencia Estatal de Meteoroloxía va activar l’avisu mariellu en tol Principáu a partir de les 15 hores por bastios tormentosos con probabilidá de rexistrar hasta 15 llitros per metro cuadráu nuna hora. Los vientos van ser fluexos polo xeneral, predominando de nordeste-esti na mariña, y de sur nel cordal.
