Esti domingu 11 de mayu a les 22.45h TPA estrena la segunda temporada de Sonadía, el programa dedicáu a la música fecha n’Asturies que conducen les hermanes Alicia Álvarez y Mar Álvarez de Pauline en la Playa y que ta realizáu por Zebrastur.
Vuelven a ser 13 capítulos nos que van apaecer una montonera d’artistes emerxentes y veteranos que representen la diversidá de los estilos musicales que se faen nel país: pop, folk, new folk, jazz, música de cámara, urbana, electrónica… La música n’asturianu vuelve a tar representada cola participación esta vegada de d’Ambás ya Ramsés, Muyeres, Llevólu’l Sumiciu, Xaime Arias Trío, Tania Pereira y Lïbre.
El formatu del programa caltiénse según desplica desplica Alicia Álvarez: «charra y actuación en directo con proyectu musical usando llocalizaciones mui especiales d’Asturies y toles llocuciones vuelven a ser n’asturianu» . Sicasí, esti añu hai novedaes como que, amás de los artistes, tamién participen nes entrevistes «otres persones que formen parte de la escena musical« pa dar la so visión al rodiu cuestiones rellacionaes cola industria sonora y col llabor de los artistes qu’acompañen. Ún de los exemplos ye l’apaición de Xicu Ariza -responsable de Musicasturiana.com- xunto a Llevólu’l Sumiciu nun alcuentru nel que tuvieron falando del Semando Fest, de polítiques musicales y del futuru de la escena n’asturianu, ente otres coses.
A les 22.45h d’esti domingu va poder vese’l resultáu na TPA, anque con dos novedaes qu’espeyen la progresiva adaptación de la cadena pública asturiana a les formes nueves de consumir productos audiovisuales: va haber un preestrenu a les 20h na web de la radio televisión pública asturiana y a la mesma hora que se va emitir pela televisión, va estrenase na canal de YouTube de TPA.
