“Lleer enséñanos a falar, edúcanos nel arte del diálogu. “Los llibros faen los llabios” solía dicir el maestru Quintiliano va venti sieglos. Dacuando atopamos n’una páxina, maraviosamente tresparentes, idees y sentimientos qu’en nós yeren confusos, y asina l’oficiu de vivir resúltanos menos caóticu. No lleío ta’l vocabulariu de nueses mesmes vides. Toos somos a la nuesa manera narradores y precisamos les palabres apropiaes para cuntar y cuntanos acaldía, para convencer y encantar a quien nos escuchen…
«Somos seres entretexios de relatos, bordaos con filos de voces, d’hestoria, de filosofía y de ciencia, de lleis y lleendes. Por eso, la llectura va siguir curiándonos si curiamos d’ella. Nun puede sumir lo que nos salva.
Los llibros recuérdennos, serenos y siempres dispuestos a esplegase énte los nuesos güeyos, que la salú de les palabres enraíza nes editoriales, nes llibreríes, nos círculos de llectures compartíes, nes biblioteques, nes escueles. Ye ellí onde imaxinamos el futuru que nos xune».
Irene Vallejo.
Manifiesto pola llectura
(Siruela, Madrid, 2020).
Nesti Manifiestu Irene fálanos del poder de los llibros y de la llectura como factor determinante non solo pa la crecedera individual de cada persona, sinón tamién como elementu esencial pa la construcción d’una meyor sociedá, por tanto, pa la evolución.
Y xuna entruga fundamental puede emponer la nuesa reflexón: ¿Qué maxa escuenden estos artefactos de fueyes y lletres pa tener el poder d’atrapanos nel so interior? L’autora establez que la clave ye la empatía, los llibros y les sos hestories atrápennos porque nos sentimos identificaos con un argumentu y con unos personaxes.
De cuenta que, si podemos venos reflexaos nel otru na ficción, tamién lo fadremos na realidá. Con éses la llectura favorez de xuru la capacidá pa entender al próximo, la empatía qu’enantes mentábamos. Esto nun asocede na mesma midida colos medios audiovisuales porque nos amenorguen a una posición d’espectador, nun nos dexen participar d’una forma tan activa, polo que’l compromisu siempres va ser menor.
Agora bien, ¿qué función cumple entós la llectura a nivel social? Senciellu, como señala Vallejo, “la llectura forma parte de la preparación necesaria pa vivir en democracia”, esto ye, entender la dimensión fora del yo va traducise, ensin dulda, nuna meyor convivencia.
Lleer, y el so correspondiente desenvolvimientu de la empatía, va favorecer xuna realidá na que los políticos son capaces de dialogar ente sí, y d’atender y entender al pueblu que gobiernen; tamién va favorecer que los ciudadanos lluchen polos sos intereses ensin apatayase unos a otros. Coles mesmes, conviértenos en meyores profesionales, en cualquier ámbitu, porque al reconocenos nos nuesos xefes y veceros, vamos saber responder d’una forma más precisa y fayadiza a lo que nos demanden. Nesti puntu, la llectura yá non solo ye útil, sinón qu’amás ye un auténticu factor económicu, aumenta’l valor del capital humanu.
Tampoco hai qu’escaecer que los llibros ayúdennos a entendenos a nós mesmos, por tanto, a entender el nuesu llugar dientro del mundu nel que vivimos. Munches de les dificultaes que podemos atopar nel nuesu día ente día pueden venir daes a cencielles pola incapacidá pa reconocer los nuesos pensamientos, sentimientos o actuaciones.
Los llibros espónennos tou esto por aciu palabres y déxennos amosanos al yo que nun entendemos nun mediu esternu, lo que facilita venos d’una forma más oxetiva. Igualmente, cabo dicir que, de dalguna forma, llevamos nel ADN xuna estrecha vinculación al llibru. Somos la única especie que puede, pero sobremanera precisa, satisfaer los sos deseos por aciu la llectura, deseos qu’otra manera s’enquistarían nel nuesu ser y torgaríen la nuesa supervivencia. Ye más, podemos baltar les fronteres del tiempu y l’espaciu, inclusive de la muerte, con palabres.
