- Principado de Asturias / Fonte: Actualidad Asturias /
El turismu asturianu afita’l so desestacionalización y crez en temporada baxa percima de la media de les comunidaes de la España Verde. Los agospiamientos recibieron en payares a 140.189 visitantes, un 17,2% más que nel mesmu mes de 2023. Los establecimientos rurales rexistraron un aumentu del 46%. Asturies suma 2,7 millones de viaxeros y empónse a un nuevu récord añal.
El sector turísticu asturianu llogró amontar la so actividá en plena temporada baxa en rexistrando una nueva xubida na llegada de turistes en payares. Los establecimientos recibieron esi mes 140.189 visitantes, un 17,2% más qu’en payares de 2023, según los datos que sopelexó güei l’Institutu Nacional d’Estadística (INE). El númberu de pernoctaciones tamién ameyoró, xubió un 20% y algamó les 282.508. Estes cifres asitien a Asturies con una crecedera de l’actividá turística percima del de les comunidaes de la España Verde, que, en xunto, recibieron un 16% más de turistes y pernoctaciones.
L’aumentu na llegada de turistes foi xeneralizáu en tolos tipos d’establecimientos. Nel casu del turismu rural, recibió a casi 15.000 visitantes, un 46% más qu’en payares de 2023, que xeneraron 34.539 pernoctaciones, un 67% más.
Tamién ameyoraron les cifres de los hoteles, con una medría del 11% na llegada de turistes, y de casi’l 14% nel d’estancies. Nesi segmentu d’actividá, tamién ye reseñable la medría de los indicadores económicos.
La bona evolución del sector traxo consigo un alza del empléu, qu’en payares xubió a 4.556 trabayadores, casi un 7% más qu’en payares de 2023. Nel acumuláu del añu, de xineru a payares, agospiarense n’Asturies 2.714.260 turistes, un 3,3% más que nel mesmu periodu del añu anterior.
La vicepresidenta del Principáu, Gimena Llamedo, agoró en conociendo estos datos qu’Asturies va cerrar un nuevu añu con récord de visitantes. “Venimos defendiendo que tenemos marxe para siguir creciendo, pero de forma ordenada y, principalmente, en temporada baxa. Los datos que vamos conociendo indíquennos que vamos na bona dirección. La crecedera produzse de forma sostenida y, sobremanera, fora de temporada alta”, destacó la conseyera de Presidencia, Retu Demográficu, Igualdá y Turismu, que considera que les estadístiques tamién amuesen que “l’esfuerzu na promoción del destín Asturies ta dando frutos”.
