Fonte: Actualidá Asturies /
Espina inaugura en Riosa la decimocuarta escuelina de la rede autonómica, pública y gratuita. El centru abre les sos puertes con dos neños y con otres trés families comenenciudes en matricular a los sos fíos.
La conseyera d’Educación, Lydia Espina, asistió güei a la inauguración de la escuelina El Diañu Burllón, asitiada nel núcleu de L´Ará, nel conceyu de Riosa. Ye’l decimocuartu centru de la nueva rede autonómica, pública y gratuita de Les Escuelines/As Escolías, y el cuartu que constrúi directamente’l Principáu dientro de la fase 1 del proyectu.
La escuelina consta d’una unidá, con capacidá máxima de 18 alumnos, dependiendo de les edaes. El nuevu centru empezó la so actividá con dos neños, pero otres trés families amosáronse interesaes en matricular tamién a los sos fíos. Na actualidá, hai 161 alumnos qu’asisten a esta rede educativa autonómica en toa Asturies.
Espina tuvo acompañada del director xeneral d’Infraestructures y Tecnoloxíes Educatives, Julio Vallaure; l’alcalde de Riosa, Roberto Álvarez, y la directora de la escuelina, Rosa Álvarez, quien va compaxinar el cargu coles futures escuelinas de Quirós y La Ribera. La conseyera visitó dempués el Colexu Públicu Alcalde Prósperu Martínez Suárez, que dirixe María del Pilar García.
La nueva escuelina riosana ta allugada nel edificiu de la ese colexo, onde se reformó una parte de l’antoxana de la planta baxa y delles árees interiores. Dispon d’un aula de casi 42 metros cuadraos, zona de descansu, aséu infantil y otru afechu, ente otres dependencies. Tamién tien un patiu esterior cubiertu y una zona de xuegos abierta. La conseyería invirtió 127.000 euros nes obres d’adecuación.
Espina destacó l’amplitú y confortabilidá de la escuelina y repitió qu’esti proyectu del Principáu cumple un doble oxetivu de “ufiertar esa etapa educativa a los neños y neñes del conceyu y tamién la de dar facilidaes a les families por que se asitien nesta zona, si nun viven equí, y les que moren puedan conciliar y trabayar con facilidá”.
La conseyera recordó que les nueves escuelinas/escolías van amontando la matrícula una vegada inauguraes, lo que demuestra que “constitúin una gran meyora social pa tolos asturianos”.
