Si ye martes de Pascua ye día de Güevos Pintos en La Pola Siero. El mercáu polesu vive’l so día grande con más de 4.000 creaciones para tolos gustos. Vemos como siguen trunfando les decoraciones tradicionales.
- Reel /
La fiesta los Güevos Pintos (n’asturianu) celébrase nes localidaes asturianes de Pola de Siero, conceyu de Siero, y Sama, conceyu de Llangréu. Celébrase’l martes siguiente al domingu de Pascua y consiste na esposición y vienta de güevos pintaos de forma artesanal. Los güevos tán pintaos con dibuxos y escenes tradicionales acompañaos de símbolos o frases alusories. Mientres tol día celébrense amás espiches, bailles tradicionales, gástense chancies, báillense dances, faise la puya del ramu y la fiesta acaba con una verbena nocherniega. La sierense foi declarada d’Interés Turísticu Nacional en 1968.
Semeyes de Paulino D. Garmón
En La Pola (n’Asturies tamién en Sama) espónense, vienden y regalen los güevos que fueron primeramente pintaos artesanalmente. Llevántase un mercadín popular con esi envís, al que lleguen miles de romeros de toles xeografíes, y dempués d’almirar los güevos tomen sidra, desfilen en xarrés, dancien, puyen el ramu y esfruten poles cais poleses.
Un momentu bien especial d’esta fiesta ye la Bendición de los Güevos Pintos na plaza del Conceyu; a partir d’esi intre cuerre la sidra, la bona gastronomía, la gaita y la fiesta, rematando con una *verbena que s’enllarga hasta la madrugada.
Famosa romería d’inciertu orixe Nel sieglu XVIII yera yá famosa esta romería. N’una crónica de 1860, roblada Protasio Sánchez Solís, lleemos: «Namá Uviéu y Xixón llevaron a la célebre romería de los Güevos Pintos un centenar de coches de caballos y una animación imposible de describir».
Los güevos cocíense entós nes antigües cocines asturianes y pintábense col sarriu de les mesmes. La fiesta conocíase col nomatu de «los Güevos Prietos». Los progresos de la química, coles invenciones de les anilines, apinó l’inxeniu de los polesos que les usaron para’l tiñíu de los güevos. Ayudabense de paliyos moyaos n’acedu nítrico, escribíen nomes, dedicatories, versos, y dibuxábense escudos, flores, etc. Foi entós cuando varió’l nome de Güevos Prietos a Güevos Pintos.
La tradición de los Güevos Pintos n’Asturies -anque tenga dellos sieglos- ye d’orixe inciertu. En Siero tresmitióse de forma oral, de xeneración en xeneración. Dicen que seique tea venceyada – ye solo una hipótesis – a les xentes que llegaron de Centroeuropa a trabayar nes mines de Siero y Llangréu, onde s’esquicen los primeros xacimientos d’hulla.
