que’l mundu natural ye importante,
y pervalible, y formosu,
y una sorpresa, y un placer.
- Fundación Biodiversidad/ imaxe /#DavidAttenborough
/ Muy Interesante / - David Attenborough: wiki / pelis y series /
Hai vides que paecen contener sieglos. Y depués ta la de David Attenborough, quien esti 8 de mayu celebra los sos 99 años con una lucidez estelante y una pasión intacta pola naturaleza. El so nome ye sinónimu de plasmu, de guapura natural, de respetu pol planeta. Ye difícil imaxinar que daquién pueda tresformar tantu la nuesa relación col mundu natural ensin llevantar nunca la voz.
Dende’l so primer programa sobro un pexe prehistóricu nos años 50 hasta’l so postreru y ambiciosu documental sobro los océanos, Attenborough foi la cara, la voz y l’alma de les hestories que nos conecten cola biodiversidá del planeta. Viaxó a los rincones más remotos, compartió planos con gorilas selvaxes, amosó cómo llate la vida na fondura de la selva o nel xelu antártico. Tou, con una elegancia narrativa que nun s’enseña en nenguna escuela de comunicación.
Una voz que marcó xeneraciones. Para millones de persones en tol mundu, la primer alcordanza d’un documental de naturaleza vien acompañáu de la so voz. Esi amiestu de sabiduría y tenrura, de precisión científica y humanidá, narró cientos d’hestories que non solo enseñen, sinón qu’emocionen. Les sos producciones, como Life on Earth, The Blue Planet o Planet Earth, non solo marcaron un antes y un dempués na divulgación científica, sinón que contribuyeron a espertar una conciencia ambiental global.
Attenborough non solo amosó’l mundu tal como ye: foi testigu de cómo camudó. A lo llargo d’ocho décades de carrera, documentó non solo la diversidá de la vida, sinón tamién la so fraxilidá. La so voz, que nun entamu falábanos con fascinación sobro criatures estraordinaries, foi adquiriendo colos años un tonu más urxente. Pasó de cuntar maravíes a llanzar alvertencies, pero ensin perder nunca la esperanza.
Una vida marcada pol interés. Nacíu en 1926 nun suburbio de Londres, Attenborough paecía destináu dende pequeñu a una vida pocu común. A los 11 años yá recoyía fósiles y vendía tritones al departamentu de zooloxía d’una universidá local. La so pasión pola bioloxía llevolu a estudiar Ciencies Naturales en Cambridge, antes de sirvir na Marina Real y, finalmente, atopar el so llar profesional na BBC.
Curiosamente, el so primer intentu d’ingresar a la emisora foi fallíu. Foi refugáu pa un puestu de productor de radio. Güei, la ironía ye deliciosa: esi mozu refugáu acabaría construyendo una de les carreres más influyentes na hestoria de la televisión británica.
El so primer programa, en 1952, trataba sobre’l celacanto, un pexe fósil vivu que paecía surdíu d’otru tiempu. De magar, nunca dexó de sosprender. Y anque percorrió tolos continentes y trió ecosistemes inexploraos, nunca pasó l’exame de conducir. Nun-y fixo falta: el so vehículu siempres foi l’interés.
Momentos que paecen ficción. A lo llargo de la so carrera, vivió esperiencies que para cualesquier otra persona paeceríen mesmes d’una película d’aventures. Dende dormir en cabanes infestaes d’aguarones n’isles remotes hasta tener qu’improvisar frente a un gorila qu’intentaba roba-y los zapatos. Foi mordíu, cutíu por cactus con escayos como aguyes de cristal y desafiáu per terrenes tan inestables como impredicibles.
Pero nunca dexó de mirar a los güeyos a los animales, d’escuchar la selva, d’esperar hores por una imaxe que dempués duraría unos segundos en pantalla. Porque, pa él, la paciencia ye una forma de respetu escontra la naturaleza. Y esa forma de mirar, lenta y sollerte, ye la qu’enseñó a millones de persones.
Compromisu col planeta, inclusive nel so platu. Nos últimos años, el so mensaxe viró con fuerza escontra la protección del planeta. A los sos 99 años, Attenborough non solo sigue trabayando: tamién camudó los sos vezos. Dexó de comer carne colorao, amenorgó’l consumu de pexe y afixo la so dieta por coherencia colo que pedrica. Cree que los xestos individuales, anque paezan pequenos, formen parte d’un tresformamientu más ampliu.
Una despidida ensin final. Al averase a los 100 años, Attenborough nun se retira nin baxa’l ritmu. El so nuevu documental, centráu na salú de los océanos, ye una prueba más de que la so enerxía paez venir de la mesma fonte que lo inspiró va décades: l’almiración pola vida. Y anque él mesmu reconoz que s’avera “a la fin de la so vida”, failo con serenidá y con una misión clara: dexar una buelga qu’inspire a curiar lo que nos arrodia.
Güei, mientres el mundu celebra los sos 99 años, non solo festexamos a un home estraordinariu. Festexamos tamién una forma de mirar. Una mirada que, ensin llevantar la voz, enseñónos que la Tierra nun ye solo’l nuesu llar: ye un regalu que tenemos de curiar con urxencia y amor.
