- Fonte: El Comercio / LNE / Actualidá Asturies /
Asturies destierra les tablets y ordenadores en Primaria. La regulación que va faer el Principáu topeta colos proyectos educativos de la cocertada y fixa como «complementarios» los dispositivos dixitales.
El Principáu reacciona énte’l discutiniu de les tablets nos colexos: asina va llindar el so usu. Asturies va regular la situación pa caltener la preponderancia de los medios analóxicos en Primaria y que los recursos dixitales sían puramente complementarios. Esta normativa topetaría colos planes d’inmersión dixital de dellos grandes centros concertaos de la rexón.
La Conseyería d’Educación va regular l’usu de recursos dixitales nes aules el próximu cursu de manera que n’Infantil van utilizase solu medios analóxicos y los dispositivos tecnolóxicos dirán introduciéndose de forma progresiva y complementaria nes etapes cimeres.
Asina informaron dende’l Principáu tres delles selmanes d’intensu alderique y rebelión d’un grupu de padres en dellos colexos concertaos de la rexón énte los planes de dellos centros d’imponer un sistema que, de facto, obliga al usu d’una tablet per cada alumnu.
El borrador de resolvimientu que peracaba Educación solo salva de la regulación a les modalidaes d’enseñanza a distancia, venceyaes fundamentalmente a la Formación Profesional (FP), y nes qu’estos dispositivos constitúin la única canal para l’aprendizaxe.
- Nel primer ciclu d’Infantil (0 a 3 años), van utilizase puramente recursos analóxicos y manipulativos.
- Nel segundu ciclu (3 a 6 años) van introducise de forma progresiva los recursos dixitales para un usu colectivu, en función de la edá del alumnáu y siempres cola supervisión directa del profesoráu.
- La propuesta na que trabaya la conseyería establez que, en Primaria, los recursos en papel o analóxicos van ser prioritarios y que les tecnoloxíes dixitales van utilizase como métodu complementariu, para actividaes concretes na aula y so la guía del docente. Sía que non, esti usu tien de quedar recoyíu nel plan dixital de cada centru y hai d’afaese a les distintes edaes del alumnáu.
- L’aplicación va ser más amplia en Secundaria y FP. Nestes etapes, les tecnoloxíes dixitales van ser una ferramienta didáctico complementaria a los recursos analóxicos, qu’en nengún casu van poder ser resalvaos nin sustituyíos de forma mayoritaria nel plan dixital de cada centru. Nel restu d’enseñances, va harmonizase l’usu de too tipu de recursos.
Les instrucciones van ser d’obligáu cumplimientu a partir del 1 de setiembre de 2025, magar se va establecer un periodu transitoriu d’un cursu completu para aquellos centros que puedan vese afectaos pol cambéu del so plan de *digitalización.
