Una de les nueses misiones nes aules ye que los alumnos y alumnes apriendan a vivir n’harmonía y asina crear un mundu más xustu nel que primen el respetu, la tolerancia y la solidaridá. Ye una xornada que se celebra añalmente’l 16 de mayu dende 2018, establecida pola Asamblea Xeneral de les Naciones Xuníes el 8 d’avientu de 2017. ONU /
Convivir en paz: un procesu necesariu para’l desenvolvimientu sostenible. La paz non yá ye l’ausencia de conflictos. Convivir en paz consiste n’aceptar les diferencies y tener la capacidá d’escuchar, reconocer, respetar y apreciar a los demás, según vivir de forma pacífica y xunida. Ye un procesu positivu, dinámicu y participativu en que se debe promover el diálogu y solucionar los conflictos con un espíritu d’entendimientu y cooperación mutuos.
L’Asamblea Xeneral, reconociendo la necesidá d’esaniciar toles formes de discriminación ya intolerancia, nel so resolvimientu 72/130, declaró’l 16 de mayu como’l Día Internacional de la Convivencia en Paz, enfatizando la importante función de la sociedá civil, incluyíos el mundu académicu y los grupos de voluntarios, nel fomentu del diálogu ente relixones y cultures, y afalando a que se sofiten midíes práctiques que movilicen a la sociedá civil, como la creación de capacidá, oportunidaes y marcos de cooperación.
La Declaración del Mileniu y el so resolvimientu resolvimientu 70/1, de 25 de setiembre de 2015, titulada «Tresformar el nuesu mundu: l’Axenda 2030 pal Desenvolvimientu Sostenible», establez la importancia de favorecer sociedaes pacífiques, xustes ya inclusives que tean llibres de la medrana y la violencia. Nun puede haber desenvolvimientu sostenible ensin paz, nin paz ensin desenvolvimientu sostenible.
Teniendo presente los propósitos y principios de la Carta de les Naciones Xuníes y especialmente l’enfotu en caltener a les xeneraciones vinientes del flaxelu de la guerra, l’Asamblea Xeneral convida a tolos Estaos Miembros a que sigan promoviendo la reconciliación, pa contribuyir a faer realidá la paz duradera y el desenvolvimientu sostenible trabayando coles comunidaes, los dirixentes relixosos y otros axentes competentes, al traviés de midíes conciliadores y servicios altruistes, ente otros medios, y afalando el perdón y la compasión ente les persones.
