Fai 40 años, nació un iconu que tescendió fronteres: Asturies, Paraísu Natural. Esti logo, que representa la esencia de la nuesa tierra, cautivó a millones de visitantes y convirtióse en sinónimu de naturaleza, cultura y tradición. ¡Celebremos xuntos cuatro décades d’ésitu y sigamos afayando los rincones máxicos d’Asturies!.
El Principáu celebra los 40 años de la marca ‘Asturies, Paraísu Natural’ con un plan d’acciones para impulsar el turismu rural y sostenible. El programa inclúi un alcuentru internacional, eventos conmemorativos por tol territoriu y una gala d’homenaxe al sector.
- Fonte: Actualidá Asturies /
“El modelu asturianu apuesta por crecer ensin perder la so esencia. Queremos atraer visitantes que viaxen fuera de temporada y valoren la nuesa autenticidá”, destaca la viceconseyera Lara Martínez
El Gobiernu del Principáu presentó güei el plan d’acciones del 40º aniversariu de la marca Asturies, Paraísu Natural, una campaña integral empobinada a impulsar el turismu rural, promover la sostenibilidá y combatir la estacionalidá. La estratexa, que yá ta en marcha y va esplegase a lo llargo del añu, combina la promoción nel esterior con actividaes conmemoratives en distintes localidaes de la comunidá.
“Queremos qu’esti aniversariu non solo sía un motivu de celebración, sinón una oportunidá para siguir fortaleciendo un modelu turísticu que desenvuelve’l territoriu dende’l respetu a los nuesos valores y a la nuesa redolada”, afirmó la viceconseyera de Turismu, Lara Martínez, mientres la presentación.
El plan inclúi una campaña de marketing experiencial, dirixida a un públicu nuevu, urbanu y dixital, que va tener llugar esta primavera en Madrid, Valladolid y Bilbao, con propuestes lúdiques y virales diseñaes para asitiar Asturies como una escapada curiosa en cualquier momentu del añu.
“El turismu asturianu apuesta por crecer ensin perder la so esencia. Por eso, queremos atraer visitantes que valoren la nuesa autenticidá y vengan fuera de temporada”, sorrayó Martínez.
Coles mires de averar la conmemoración a tola ciudadanía, el Principáu va entamar siquier cuatro eventos en distintos conceyos, asegurando un enfoque territorial y participativo. Van Ser les Carreres del Paraísu, pruebes deportives que van tener como colofón una romería en meta para les families de los y les participantes con música en directu, xuegos tradicionales ya infantiles.
Na seronda, Asturies va acoyer l’Alcuentru Internacional de Turismu Rural, que va axuntar nel conceyu de Cangues d’Onís a profesionales y espertos para aldericar sobro los desafíos y oportunidaes d’esti segmentu clave na estratexa turística asturiana.
Concursos, sellu conmemorativo y gala d’homenaxe. La campaña preve, amás, la producción y espardimientu de pieces audiovisuales, la edición llindada d’un sellu de Correos dedicáu al aniversariu y un concursu de fotografía que va premiar los meyores rincones y esperiencies captaes por visitantes y residentes.
Como colofón, l’Executivu autonómicu va entamar nel últimu trimestre del añu xuna gala institucional d’homenaxe al sector na que se va reconocer el llabor de quien contribuyeron a consolidar la marca Asturies, Paraísu Natural nestes cuatro décades.
Toes estes actividaes tamién busquen sensibilizar a la sociedá asturiana sobro’l valor económicu, social y cultural del turismu sostenible.
