- Alborecemos ente’l borrín y la nublina na fastera central asturiana, tando escampláu nel restu con unes temperatures que tan alrodiu de los 13ºC, rexistrándose nel puirtu Payares 9,7ºC.
- Güei mentantu esfruten del sol na mayor parte d’Asturies na fastera central dirá dixebrándose’l borrín del alborecer hasta escamplar allá al mediudía. Per otru lláu aumentará la nubosidá alta d’oeste a este anque solo conseguirá empuercar dalgo’l cielu. Les temperatures n’ascensu y l’aire sele de componente norte-nordés.
- Mañana domingu va tar poco nuboso en xeneral pela mañana con un ascensu bultable de les temperatures, yá pela tarde va dir medrando la nubosidá de desendolque que mos dexará xarabatos de calter tormentosu na fastera ocidental d’Asturies, siendo menos probables cuantu más al oriente mos atopemos, asina y too llegarán a toa Asturies pero yá col camudu’l día y durante’l riscar del llunes. L’aire sedrá sele ya varibale en xeneral.
- El llunes paez qu’un embolsamientu d’aire fríu n’altor va pasar perriba d’Asturies apurriéndonos nubosidá abondosa acompangada de xarabatos tormentosos xeneralizaos que podrán tener calter moderáu con un descensu nidiu de les temperatures ya col aire que rolará a componente norte.
- Pa más alantre hai muncha incertidumbre, el modelu européu mos empobina tiempu casi ivernal, mentantu l’americanu dai más protagonismu al anticiclón pa dir abrazándonos a lu llargu la selmana pero esto yá lu diremos viendo.
