Iniciativa pol Asturianu ta acabante de poner en marcha’l Buzón del Asturianu. Un serviciu nuevu, gratuitu y abiertu a tola ciudadanía pa canalizar les quexes ante alministraciones, instituciones y empreses que vulneren los drechos llingüísticos de los falantes. Tamién pa treslladar suxerencies, propuestes y felicitaciones a aquelles organizaciones que seyan un exemplu y den pasos alantre pa garantizar el drechu a vivir n’asturianu.
¿Por qué naz el Buzón del Asturianu?
Son munches les persones que selmana tres selmana contacten con nós pa comunicanos la vulneración de los sos drechos como falantes, pasos atrás na presencia del idioma o felicitaciones a entidaes pol bon usu del asturianu. Davezu, munches d’eses persones nun conocen los drechos que tienen como falantes o nun saben cómo exercelos. D’esta manera, queremos animar a la ciudadanía a ser parte activa na defensa de los sos drechos llingüísticos.
¿Cómo entro al Buzón del Asturianu?
Si fuisti víctima de dalguna d’estes situaciones y quies facemos llegar una denuncia, felicitación o, simplemente, dalguna consulta, namás vas tener que rellenar el formulariu que vas atopar na nuesa web. Pa ello vamos pidite que nos facilites los tos datos personales y de contactu. Comprometémonos a caltener siempres el to anonimatu.
¿Qué va pasar colos avisos que lleguen?
El Buzón del Asturianu ye un espaciu abiertu a la sociedá y un instrumentu pa visibilizar la realidá llingüística del asturianu y del eonaviego. Les denuncies, suxerencies, felicitaciones y consultes recibíes van ser tramitaes por Iniciativa pol Asturianu pa buscar soluciones y evitar que determinaes situaciones se repitan nel futuru. Amás, vamos ellaborar un informe añal, que va permitir facer siguimientu de cuáles son les problemátiques que más afecten a la ciudadanía.
Queremos animate a facenos llegar cualesquier cuestión sobre l’asturianu que consideres que pueda resultar d’interés y a compartir el buzón con aquelles persones que carezan situaciones de discriminación llingüística.
