Reabre’l mirador del Fitu tres delles selmanes cerráu por riesgu d’accidentes. L’emblemáticu enclave sufrió numberosos actos vandálicos que yá fueron reparaos gracies a una inversión que supera los 5.600 euros.
- Fonte: Actualidá Asturies / El Comercio
El mirador del Fitu, en Parres, reabrió al públicu tres delles selmanes cerráu por culpa de los vándalos. L’emblemáticu enclave, dende’l que se puede otear Sierra del Sueve, el Parque Natural de Ponga y los Picos d’Europa, sufrió numberosos desperfectos que poníen en xaque la seguridá de los visitantes. Dempués d’una inversión de 5.651 euros executada pola empresa Tinastur, la Conseyería de Mediu Rural y Política Agraria d’Asturies el xueves a la fin pudo volvese a xubir les sos emblemátiques escaleres.
Según esplicó’l Principáu, reparóse la barandiella y retiráronse les valles que torgaben el pasu. Amás, llimpióse’l mirador y retiróse basura y elementos cortantes. Tamién se rozó la redolada, l’aparcamientu y el camín d’accesu.
Mediu Rural trabaya, amás, pa impulsar una actuación forestal de mayor algame, que va incluyir la llimpieza de senderos, la eliminación d’árboles alóctonos que torguen la visión dende’l mirador y la llimpieza integral de la caseta.
La Xunta Alministrativa de Cofiñu, entidá xestora de la propiedá del monte —que pertenez a los ocho pueblos del conceyu de Parres, Cofiñu, Bodes, La Vita, Montealea, Villar, Pandiellu, Fios y Villanueva de Fíos— adoptó la decisión de cerrar el mirador «como midida prioritaria pa salvaguardar la seguridá de tolos visitantes». Los continuos actos vandálicos nesta redolada estropiaron elementos clave, como les barandielles del senderu d’accesu «poniendo en peligru la integridá física de quien transiten por él».
