Crespo fabricó’l gol col que les moces van xugar la siguiente temporada na categoría de plata del fútbol español. ¡Norabona! El Femenín yá ye equipu de primera Federación. Les xugadores d’Andrea Suárez llograron l’acobiciáu ascensu tres una temporada brillosa, na que se caltuvieron na zona noble en tou momentu.
El choque empezó tirante. Alendábase la presión, tantu nel campu, como nes graes de San Cloyo, totalmente atarraquitaes de siguidores azules. Énte l’alta demanda d’entraes, l’Uviéu tuvo qu’habilitar una de les bandes por que la xente pudiera siguir el partíu. Les d’Andrea Suárez apoderaron nos primeros intres, con llegaes de peligru que punxeron n’apiertos a la meta rival. Notábase que les carbayones queríen ponese percima nel marcador pela vía rápida. Y asina foi. A los 22 minutos, l’Uviéu botó un bon córner. El balón, alto, foi rematáu por una de les zagueres tinerfeñes y terminó dientro de la rede, siendo imparable pa l’arquera. 1-0.
