- Taller del escultor Herminio n’A Caridá (El Franco), puru «ARTE» y «magnetismu social »
- Herminio: bio / presentación ppt / wiki / RTPA / LNE /
L’escultor Herminio, un referente artísticu nacional n’El Franco
Más de 4.000 obres, cola abstracción como pilar, en 30 años de carrera
Güeyando’l so vieyu álbum, Herminio Álvarez recuerda cómo foi’l críticu d’arte, Jesús Villa Pastur, el que descubrió nes antigües fotos de los escaparates del supermercáu, que tenía daquella, la so capacidá pa la escultura.
Anque la so pasión pol arte lu acompañaba dende la infancia, nun foi hasta la so madurez, y gracies a los ánimos de Villa Pastur, cuando Herminio se llanzó de cabeza a la so pasión na que güei ye tou un referente, sobre manera nel tarrén de los campos magnéticos.
Un camín llargu qu’entamó cola pintura de paisaxes pasando, por exemplu, peles miniatures. Recuerda los conseyos d’Humberto, dempués de pasar pel so taller, de trabayar la escultura. La esixencia económica d’esta opción fizo tirar a Herminio d’imaxinación.
Del cartón a la madera y d’ehí al aluminiu pa llegar al aceru. Más allá de cualquier inspiración, diz Herminio, el so trabayu ye la rempuesta natural a los sos sentimientos y forma de vida.
Nos más de 30 años de carrera, suma yá más de 4.000 obres, nes que l’abstracción xuega un papel fundamental. Un procesu creativu que tien los sos propios pasos.
Son delles les claves d’esta abondosa actividá. Una, el so propiu pueblu, A Caridá. El so llugar nel mundu, señala. Otra, la so familia: la so muyer y fíes. Sofitu irrompible, agradez.
Tamién guarda especial cariñu pa unu de los sos tíos, un maestru de la forxa, y del qu’heredó la so capacidá artística.
Güei a Herminio reclámenlu nos principales certames d’España y del estranxeru.
La so ilusión ye la puesta en marcha d’un espaciu artísticu n’El Franco qu’acueya al medrante númberu de creadores del occidente, y de los qu’él, ensin querer, ye tou un referente.
La busca como motivación, ye una de les necesidaes de la producción artística d’Herminio. L’artista trabaya y esperimenta con diversos materiales, testures y colores, xuntu con múltiples soportes que contienen, tomen, reflexen, soporten y distribúin les sos creaciones por tolos espacios posibles, onde xeneren un habitat propiu, coles sos pequenes sotileces y los sos enormes magnetismos. Introdúcennos n’una atmósfera qu’irradia tanta maxa como fascinación, con tintes minimalistes, suprematistas y del mundu cinéticu.
Realizó esposiciones a nivel nacional ya internacional en Toronto, Lisboa, París, Miami y Tokio, amás de participar en delles ocasiones en feries como ARCO Madrid y Art Madrid. El trabayu d’Herminio forma parte de colecciones tan destacaes como la del Muséu de La Rioxa, el Muséu de Belles Artes d’Asturies, la Fundación Príncipe d’Asturies, la Colección Dove de Nueva York y la Colección Masaveu; y tamién puede contemplase n’espacios públicos como’l Parque del Rinconín de Xixón, el Complexu Cultural As Quintes d’A Caridá, l’HUCA, la entrada d’A Veiga y la Plaza de la Poesía n’Uviéu.
