- Fonte: Huffintonpost /
Esta especie foi reintroducida na naturaleza la pasada seronda nun atolón allugáu al sur de Honolulu, Hawái. Una especie d’ave en peligru d’estinción acaba de poner güevos na naturaleza per primer vegada en 40 años. Trátase de los martines pescadores de Guam (o Todiramphus cinnamominus ), según anunció la Sociedá Zoolóxica de Londres (Reinu Uníu).
En septiembre de 2024, nueve nuevos martines pescadores de Guam criaos en cautividá fueron reintroducíos na Reserva del Atolón Palmyra, alministrada por The Nature Conservancy, como parte del Programa de Recuperación dedicáu a estes coloridas aves y qu’axunta a dellos conservacionistas.
L’equipu d’investigadores que participa nesti proyectu celebró’l descubrimientu de los primeros güevos n’ese atolón allugáu al sur d’Honolulu, Hawái (EE UU). Les nueve aves (cuatro femes y cinco machos) reintroducíes na naturaleza la seronda pasada rápido empezaron a esquizar el so nuevu llar y a aprender a buscar alimentu na selva tropical.
De magar, cuatro pareyes establecieron los sos territorios, construyíu los sos niales y puestu güevos. “Ésta ye la primer vegada que la especie reproduzse n’estáu selvaxe dende la so estinción na so isla natal de Guam na década de los ochenta”, dixo la Sociedá Zoolóxica de Londres (ZSL), unu de los socios del proyectu, nun comunicáu.
Según la Llista Colorada de la Unión Internacional para’l Caltenimientu de la Naturaleza, el martín pescador de Guam escástase n’estáu selvaxe en 1986 como resultáu de la depredación de la exótica culiebra arbórea parda invasora (Boiga irregularis).
“Munchos de nós pasamos la fin de selmana de Pascua buscando güevos por tola isla”, dixo John Ewen, profesor del Institutu de Zooloxía de ZSL y coordinador del programa de recuperación d’aves. Na so opinión, representa «un finxu notable na llucha de décades para rescatar al martín pescador de Guam del cantu de la estinción. Esti momentu de celebración ye un verdaderu testimoniu de la dedicación de tolos que trabayaron incansablemente para protexer y restaurar a esta increíble ave».
Los martines pescadores de Guam fueron abrasaos cuando la culiebra arbórea marrón foi introducida por fuerza na isla na década de los cuarenta. El postreru martín pescador selvaxe foi vistu en 1988. Pero cuando la población yá taba colapsando, los biólogos de Guam rescataron 29 aves y empezaron un programa de cría en cautiveriu al traviés de l’Asociación de Zoolóxicos y Acuarios (AZA) con instituciones en tou Estaos Xuníos.
L’atolón Palmyra foi escoyíu para ser el llar de los primeres martines pescadores de Guam n’aprosimao 40 años porque nun tien depredadores y ta dafechu protexíu.
