Asturies acueye’l Campeonatu d’España de selecciones autonómiques de voleibol en categoría infantil y cadete. Avilés, Llangréu y Corvera van ser hasta esti domingu l’epicentru del vóley nacional. La conseyería de Cultura destaca l’apueste del Gobiernu del Principáu pol deporte escolar como ferramienta de salú, educación en valores y cohesión social
El Principáu d’Asturies acueye estos díes el Campeonatu d’España n’Edá Escolar (CESA) de voleibol nes categoríes infantil y cadete, tantu masculines como femenines. Esti eventu asitia nuevamente a Asturies nel mapa del deporte nacional, al axuntar a los meyores talentos de les federaciones territoriales y a les futures promeses del voleibol español.
La competición, que cunta col respaldu de la Conseyería de Cultura, Política Llingüística y Deporte, celébrase hasta’l domingu nos conceyos d’Avilés, Llangréu y Corvera d’Asturies.
Esti campeonatu sumase al yá celebráu anguaño nel Centru Deportivu Juan Carlos Beiro de Llangréu, onde tuvo llugar el CESA de Bádminton. Con ello, Asturies allugó yá dos Campeonatos d’España n’Edá Escolar no que va de 2025, gracies a la destacada capacidá organizativa de les federaciones territoriales de la rexón.
La Conseyería de Deporte punxo en valor la celebración d’estos eventos, sorrayando que’l fomentu de la práctica deportiva n’edaes tempranes ye una prioridá estratéxica del Gobiernu del Principáu. Esti apueste pol deporte escolar concíbese como una ferramienta clave para la salú, la educación en valores y la cohesión social.
La celebración d’estos campeonatos enmárcase na designación d’Asturies como Rexón Europea del Deporte 2025, una reconocencia que refuerza’l compromisu del Principáu cola promoción de l’actividá física y l’organización de grandes eventos deportivos.
