El Principáu convoca la primer Escuela de Formadores en Coeducación para liderar el tresformamientu educativu con perspectiva de xéneru. Les participantes van adquirir ferramientes para instruyir dempués a docentes nesti modelu d’igualdá de derechos, oportunidaes y trabayu ente muyeres y homes. Va cellebrase del 7 al 11 de xunetu nel Centru de Crisis pa Víctimes d’Agresiones Sexuales d’Uviéu.
El Gobiernu d’Asturies va celebrar en xunetu la primer Escuela de Formadores en Coeducación, una iniciativa pionera que busca formar a profesionales capaces de liderar procesos de sensibilización y tresformamientu educativu dende la perspectiva de xéneru. Concebida como un espaciu de capacitación intensiva, va dexar a les participantes adquirir ferramientes teóriques y práctiques pa instruyir dempués a docentes y axentes educativos nesta materia.
La formación va impartise del 7 al 11 de xunetu, en modalidá presencial y n’horariu de 9:00 a 15:00 hores, nel Centru de Crisis pa Víctimes d’Agresiones Sexuales d’Uviéu.
A lo llargo de trenta hores, les participantes van adquirir conocencies especializaes sobro igualdá, feminismu, lexislación, diagnósticu del sexismu nos centros educativos, oratoria, comunicación y usu de tecnoloxíes especializaes nesti ámbitu.
L’equipu docente ta compuestu por cuatro reconocíes espertes nesti sector: Emma González, Marian Moreno, Carmen Ruíz Repullo y Laura Viñuela, quien van encetar cuestiones clave pa empoderar a futures formadores y acompañales na so preparación pa falar en públicu, estructurar presentaciones eficaces, utilizar ferramientes dixitales y responder con solvencia énte situaciones de resistencia o negación del feminismu.
Esta escuela enmárcase nel Plan de Coeducación del Principáu d’Asturies 2023‑2027, materializáu nel programa Coeducastur, xuna iniciativa qu’empezó la so fase piloto en 2023 con nueve centros públicos y que, por cuenta de la so bona acoyida, amplió’l so algame. Representa un pasu más nel compromisu del Gobiernu asturianu cola igualdá nel ámbitu educativu, consolida’l so papel como referente en polítiques educatives feministes y apueste por una rede sólida de formadores que contribuyan a construyir una escuela más xusta, equitativa y llibre de violencia.
- Diríxise a docentes, profesionales del ámbitu educativu y persones comenenciudes na formación n’igualdá.
- Hai 40 places disponibles, que se van axudicar por orde d’inscripción.
- Les persones pueden inscribise al traviés del siguiente formulariuhttps://forms.office.com/e/T8rZhMUc5e
