El to fíu o fía empieza la universidá. Tu aforres la matrícula. El Principáu paga’l primer cursu de los estudios de grau na Universidá d’Uviéu. Pa qu’estudiar nun dependa de lo qu’una familia pueda permitise. Un gastu menos. Un compromisu más del Gobiernu d’Asturies cola #educación.El cursu 2025-2026 va ser el primeru nel que s’enllante esta midida de gratuidá universitaria.
Coles mires de garantizar el derechu universal a la educación, el Principáu decidió reforzar el so sofitu a la universidá pública, garantizando que los estudiantes que se matriculen nes sos aules nel cursu 2025-2026 van tar exentos d’abonar la matrícula, siempres que nun dispongan d’otra ayuda o beca pol mesmu conceutu.
La midida pon el focu nel rendimientu académicu del alumnáu y non na so situación económica. Va Ser el Principáu quien financie’l costu de la matrícula mientres la carrera a tolos estudiantes que cumplan los requisitos académicos que s’esixan.
El Gobiernu d’Asturies completa asina’l sofitu a tolos niveles educativos, al acompañar al alumnáu dende los sos primeros meses d’escolarización na rede pública, autonómica y gratuita de Les Escuelines/As Escolías; nes etapes d’Infantil, Primaria, ESO, Bachilleratu y Formación Profesional y, agora, tamién na educación cimera na Universidá d’Uviéu.
Los universitarios que yá tean cursando una carrera van beneficiase de la conxelación de los precios públicos per sestu añu consecutivu, n’estudios de grau, máster y doctoráu, en sintonía colo que se vien faciendo nos últimos años. La midida va beneficiar el próximu cursu a más de 20.100 estudiantes matriculaos nun títulu de grau, máster o doctoráu, que van pagar una media de 300 euros menos que fai 13 años.
Con esta decisión, el Principáu consolídase como una de les comunidaes onde resulta más baratu estudiar una carrera universitaria. El preciu mediu en primer matrícula del creitu European Credit Transfer System (ECTS), qu’equival a 25-30 hores de formación, asítiase en 12,21 euros nos títulos de grau, bien per debaxo del que taba a valir nel cursu 2011-2012 (17,13 de media). Nel casu de los másteres universitarios, la media por creitu ye de 23,8 euros.
Estes midíes respuenden al compromisu del Gobiernu d’Asturies de fomentar l’accesu a la enseñanza cimera pública, de cuenta que’l nivel de renta nun pueda ser una torga pa tener estudios universitarios. Coles mesmes, pretenden amenorgar l’abandonu, cuidao que los mesmos precios aplícase a les segundes y socesives convocatories.
