- Alborecemos una vegada más ente’l borrín y la nublina ya orpinando na mayor parte d’Asturies con unes temperatures que tan alrodiu de los 13ºC, rexistrándose nel puirtu Payares 6,2ºC.
- Güei seguiremos baxu esti mugor perenne con precipitaciones febles ya persistentes en forma d’orbayu durante la mañana con tendencia a desaparecer pela tarde ya inclusu abrise tímidos claros o abancios. Les temperatures camudarán poco o descenderán llixeramente calteniéndose un ambiente fríu pa la época na que mos atopamos. L’aire sedrá sele con predominiu de la componente norte.
- Mañana miércoles seguiremos con munches nubes nel cielu pero sin precipitaciones y paez que les temperatures pali que pali tienden a recuperase. L’aire sedrá de componente norte dalgo cafiante na costa y zones espuestes.
- El xueves por fin veremos el sol ya tendremos un día afayaizu y prestosu con temperatures n’ascensu pero sin pasar calor.
- El vienres volverá a ser un día soleyeru, sicasí l’aire nordés pue ser cafiante nel llitoral y facer que la sensación térmica seya desagradable allí onde nun temos al abellugu d’él. Les temperatures subirán nel interior y nun camudarán na costa.
- Paez que la fin de selmana nun lloverá pero nel cielu tendremos nubes, pero esto yá lu diremos viendo.
