El colectivu artísticu uh513 formáu por María Castellanos (Xixón, 1985) y Alberto Valverde (Madrid, 1967) lleva más de quince años tratando d’ameyorar la comunicación ente humanos y otros seres vivos al traviés del arte y sofitaos nes últimes meyores tecnolóxiques.
Asina lo fixeron, cuantimás, coles plantes, traduciendo con sensores los movimientos de raigaños y fueyes, o ameyorando los sistemes colos qu’un humanu puede interpretar les condiciones de la redolada en que vive. Agora, en llogrando ser unu de los diez equipos escoyíos per Europa pal programa «Hungrey Ecocities» dientro de la convocatoria «Paths to progress experiments», Castellanos y Valverde trabayen nos montes d’Ayer, en Felechosa, instalando los sos sensores nun truébanu de la productora ecolóxica Olaya Miel p’ayudar a una empresa holandesa, Beesage, a faer la vida más fácil a los apicultores europeos, ayudando a antemanase a los problemes que puedan tener nes sos esplotaciones y a ameyorar la vida de los insectos y la so relación colos sos cuidadores.
El truébanu «cyborg», como bromia María Castellanos, lleva yá instalada un mes en Felechosa y l’equipu confía n’empezar a trabayar colos primeros datos nes próximes selmanes. Lo qu’ellí asocede, tantu dientro como fora, ye rexistráu al traviés de distintos sistemes que, n’última instancia, traten d’establecer una conexón coles abeyes más «ecosistémica»: «El mundu de les abeyes paeciónos bien interesante y hai una continuidá col nuesu trabayu coles plantes», esplícase María Castellanos.
«Les abeyes son imprescindibles para l’ecosistema, son polinizadores; la vida sería bien difícil ensin elles, y anque a elles posiblemente diría-yos meyor ensin los humanos, queremos saber tamién con esti trabayu, yá que comemos el so miel, cómo tratales con más respetu y saber cuál ye, tamién, la visión de los apicultores».
A estes altures del proyectu, el colectivu arístico ta moviéndose toles selmanes de Xixón a Felechosa para controlar sensores y xixilar el truébanu. Dientro instalaron la báscula intelixente de Beesage y tamién sensores de temperatura, soníu y mugor. Nel esterior, la cámara d’uh513 mide’l númberu d’abeyes qu’entren y salen del truébanu. Tol sistema ta conectáu a los servidores de los artistes y yá tienen visualización de la temperatura y del vientu. Cuando la recoyida de datos tea avanzada, van empezar a aplicar l’analís de la intelixencia artificial y van ver «qué pasa».
