Los díes 27 y 28 de xunu nel conceyu de Bual, celébrase la Pita Festa, un festival integrador que visibiliza el rural y crea espíritu de comunidá.
«Tres la edición de 2022 constituyímonos n’una asociación coles mires d’impulsar la vida na zona rural. Al traviés de la cultura y l’arte quixímos crear espacios de convivencia qu’atraxeren xente al pueblu y punximos en marcha un coworking, l’Acougo de PitaSana, –esplica Noelia García, fundadora del Festival xuntu col so home Pablo Vélez–. Tamién dexamos l’escenariu montáu y adulces tamos construyendo una sala alternativa, por eso llámase’l Gallineru Culturero. Anguaño fiximos la caxa negra del teatru».
Pita Festa o Pita Fest, como se-y conoció nes sos primeres celebraciones, ye poles sos característiques una rara avis nel calendariu de los festivales, pero yá se ganó’l corazón del públicu ya intérpretes y espérase-y cada añu na axenda cultural del occidente asturianu.
El formatu d’esti certame caltien la llínea propuesta en 2016, cuando empezaba a dar los sos primeros pasos y pretendía celebrar una fiesta rural d’ámbitu modestu na que pudieren esfrutar tantu persones mayores, como moces o families enteres. L’espíritu integrador sigue vixente porque asina ye como entienden que ten de ser la forma de vida nel rural.
«Nós nun queremos crecer y ser macros –esplica la bualesa de Pita Sana–, queremos ser pequeñinos, modestos y que’l Festival sía un llugar seguru onde pueda venir xente diverso y nun se sienta atropellada. Na primer parte del día y hasta les 7 de la tarde, l’ambiente ye abondo familiar porque hai munches actividaes para los neños y les families pueden esfrutar de la xornada ensin tar esmoleciéndose por pecar, que tienen la so propia actividá paralela. A partir d’esa hora, yá empieza a llegar más xente nuevo».
El formatu d’esti certame caltien la llínea propuesta en 2016, cuando empezaba a dar los sos primeros pasos y pretendía celebrar una fiesta rural d’ámbitu modestu na que pudieren esfrutar tanto persones mayores, como moces o families enteres.
Tres un añu de preparación, avérense les feches d’esti certame qu’esibe músculu rural y pon, cada añu, al conceyu de Boal nel mapa. Como nos sos entamos, la cita contempla actividaes variaes como la creación d’un mural colectivu, nesta ocasión dirixíu pola ilustradora muralista Anartista (Ana Fernández), un taller de forxa para toles edaes a cargu del maestru Víctor Aguilar (La Fragua del Osu), un espectáculu teatral en clave de comedia al cargu de Trivilorio Impro que cunta cola participación del públicu y actuaciones musicales pensaes para motivar a distintes franxes d’edá.
Los sos organizadores, l’asociación El Gallineru Culturero, traen para esta ocasión un variáu elencu d’artistes, dellos llegaos del sur de la península, como Karmento qu’aterriza cola so propuesta neofolk Castiella-La Mancha. «Anguaño decidimos abrilo un poco más porque de normal venía xente de Galicia o Asturies –esplica Noelia, vecina d’Armal–. Amás de Karmento, vien tamién El Naán Tríu, un grupu que llega dende los pandoriales del Cerrato Palentín».
El folclor iberoamericanu va tar presente gracies a La Irreverente, ente que Clandestías – Pandereteiras del Navia van poner el ritmu y los raigaños del territoriu, acompasaes poles sos voces. Nesta ocasión, el fin de fiesta definitivu va tar al cargu de Killaphonía, una DJ de panderetería feminista cola que cerrar el baille.
Trivilorio Impro nuna representación na Pista Festa.
Víctor Aguilar, artesanu y fundador de La Fragua del Osu.
Un espectáculu teatral en clave de comedia al cargu de Trivilorio o un taller de forxa para toles edaes a cargu del maestru Víctor Aguilar (La Fragua del Osu), son dalgunes de les actividaes de la nueva edición de la Pista Festa.
Anque’l día clave de la Pita Festa va ser el sábadu 28 de xunu, el vienres 27 vien con actividaes interesantes que van dir preparando l’ambiente. Nesta xornada, l’escenariu ye’l Llavaderu de la localidá de Bual onde se va conocer la resultancia de la residencia artística entamada pola Asociación sol lema “Diseñando’l tiempu”. «La residencia, que va empezar el miércoles y na que van participar vecinos de Bual, -esplica Noelia- consta de cuatro talleres nos que se va faer xuna investigación sonora y hestórica sobremanera lo que socedió nel llavaderu y lo que significó para la xente del pueblu».
El vienres 27, los asistentes van poder conocer les conclusiones de la investigación y esfrutar d’un viaxe sonoru pola memoria, l’agua y el tiempu al traviés de l’actuación músicu teatral d’Antía Seijas y Ana Pereda. Tres l’actu, les cais de Bual van anubrise col ritmu y les voces de Clandestías, les pandereteiras del Navia.
«Tolo que se fai’l vienres ye gratuitu, queremos tender pontes cola xente de Bual, de forma qu’entiendan qué ye lo que faemos na Pita Festa y por qué lo faemos», esplica la impulsora del Festival.
L’eventu bualés va tener tamién xuna importante repercusión nos medios al traviés del programa de Radio Nacional, España Rural, que va tar presente para recoyer los testimonios d’entamadores, artesanos y públicu asistente al Pita Festa. «Van Dar visibilidá al pueblu de Bual con una retresmisión en directu’l sábadu, ente que lo grabao’l vienres emitiráse’l domingu», añede la bualesa.
