- L’amuesa va poder visitase dende güei hasta’l 22 de setiembre n’Uviéu, como homenaxe a los 75 años del primer desfile
La Conseyería de Cultura, Política Llingüística y Deporte, al traviés de la Biblioteca d’Asturies Ramón Pérez de Ayala y en collaboración cola Sociedá Uvieina de Festexos (SOF), inaugura güei una esposición dedicada al Día d’América n’Asturies, una de les fiestes más emblemátiques del calendariu uvieín declarada d’Interés Turísticu Nacional, y por estensión, a la emigración asturiana a ese continente.
L’amuesa, titulada Día d’América n’Asturies: suaños y realidaes d’ultramar, propón un percorríu emocional y documental pola hestoria de los miles d’asturianos y asturianes qu’emigraron al nuevu continente ente finales del sieglu XIX y empiezos del XX. Al traviés de vitrines con oxetos personales, llibros, cartes, fotografíes, cuadros y cartelos, les persones visitantes van poder alicar una parte esencial de la memoria colectiva asturiana hasta’l 22 de setiembre.
Los materiales espuestos vienen de instituciones como’l Muséu del Pueblu d’Asturies, el Muséu de Belles Artes d’Asturies, la Fundación Evaristo Valle, la SOF y la mesma Biblioteca d’Asturies, lo mesmo que de donaciones particulares de families d’emigrantes.
La esposición foi comisariada por Jesús Álvarez-Llinera Prau y cuenta con un catálogu nel que más de trenta autores cavilguen sobro la emigración y la celebración del Día d’América. Esta actividá enmarcar na conmemoración del 75 aniversariu del primer desfile, celebráu en 1950.
