La iniciativa, na que collaboren Codopa y Eapn-As, va desenvolvese’l domingu n’Uviéu y va cuntar con un ampliu programa de talleres y actividaes lúdiques.
La Conseyería d’Ordenación de Territoriu, Urbanismu, Vivienda y Derechos Ciudadanos entamó la xornada Yes Pegollu, una iniciativa que promueve l’asturianía dende una perspectiva de solidaridá, sostenibilidá y respetu. L’oxetivu últimu del alcuentru, que se va desenvolver el domingu de 12:00 a 17:00 hores nel espaciu Kuivi Almacenes, d’Uviéu, ye fomentar la xusticia social y l’igualdá.
El director xeneral d’Axenda 2030, Juan Ponte, presentó güei el programa al pie de Rocío Álvarez y Javier Arjona, de la Coordinadora Asturiana de ONGD (Codopa), y Elena Rua, de la Rede Europea de Llucha Contra la Probeza y l’Esclusión Social n’Asturies (Eapn-As), entidaes collaboradores na iniciativa.
Ponte, esplicó que los oxetivos de la xornada alliniar con trés pilastres del so departamentu: la sostenibilidá social, medioambiental y económica. “Seríen como los pegollos del horru, d’esa casa común n’una comunidá inclusiva que queremos construyir”, espresó mientres la presentación.
Coles mesmes, estimó a les entidaes collaboradores el trabayu de la so campaña Yes Asturies, na que s’enmarca la xornada dominical: “Pon en valor la importancia d’una comunidá inclusiva y solidaria nun mundu trevesáu por discursos intensamente belicistes y militaristes, que ponen en riesgu l’oxetivu 16 de l’Axenda 2030, el de la paz”, sorrayó.
D’esta miente, el director xeneral defendió la necesidá de trabayar por una sociedá crítica y con capacidá de refugar midíes estraordinaries como l’aumentu, al so xuiciu, “absolutamente tresmandáu” del gastu en defensa o les restricciones de llibertaes individuales y colectives. Nesi contestu, recordó, l’Axenda 2030 “nun dexa de ser una emanación de la Declaración Universal de los Derechos Humanos”.
