La OSPA celebra esti vienres la riqueza del ‘Patrimoniu de la Humanidá’ con un programa sinfónicu de grandes cumes universales. Rubén Díez dirixe un programa que funde les grandes cumes del repertoriu clásicu que val pa celebrar la cultura sidrera asturiana. Les entraes pueden sacase al traviés de la web de la orquesta o na taquilla del auditoriu.
La Orquesta Sinfónica del Principáu d’Asturies (OSPA) va ufrir esti vienres 27 de xunu, a les 20 hores, nel Auditoriu Príncipe Felipe d’Uviéu, el conciertu estraordinariu Patrimoniu de la Humanidá, un programa qu’axunta la universalidá de la música sinfónica col arguyu de les nuestres raíces culturales. Baxo la batuta del director asturianu Rubén Díez, la OSPA fai homenaxe a dalgunes de les grandes cumes del repertoriu clásicu —Mozart, Beethoven, Chaikovski, Dvořák y Haydn—, nun chisgu simbólicu a los valores qu’axunten l’arte cola identidá colectiva de los pueblos.
Esti conciertu celébrase amás nun momentu bien significativu p’Asturies, depués de la declaración recién de la cultura sidrera asturiana como Patrimoniu Cutural Inmaterial de la Humanidá pola Unesco. Una tradición milenaria que va muncho más p’allá d’una bebida: ye ritu, ye comunidá, ye paisaxe, ye fiesta y memoria compartida. La música y la sidra dánse la mano nesta cita pa reivindicar l’arguyu de lo que somos, dende lo local a lo universal.
La velada sinfónica va incluyir cinco sinfoníes universales que marcaron la historia de la música: la n.u 41 en do mayor Xúpiter de Mozart, la n.u 5 en do menor de Beethoven, la n.u 6 en si menor Patética de Chaikovski, la n.u 9 en mi menor Del Nuevo Mundo de Dvořák y la n.u 45 en fa sostenido menor De los adioses de Haydn. Un percorríu sonoru pela emoción, la llucha, la señardá y la esperanza, que conecta colos valores más fondos de la humanidá.
Al frente va tar Rubén Díez, una de les figures más brillantes del panorama musical actual. Natural d’Avilés, la so carrera ta marcada pol talentu, la formación rigorosa y una sensibilidá artística que lu llevó a dirixir en teatros y festivales importantes tanto n’España como nel estranxeru. Formáu na Scuola Civica de Milán y nel Real Conservatoriu Superior de Música de Madrid, trabayó con nomes de referencia y dirixó orquestes, óperes y proyectos muntidisciplinares que demuestren la so versatilidá. Nel 2023 yá se punxo al frente de la OSPA na xira OSPA de Cerca.
Les entraes pal conciertu pueden sacase al traviés de la web de la orquesta asturiana (www.ospa.es) o na taquilla del Auditoriu Príncipe Felipe ente les 9.30 y les 14.00 hores los díes d’enantes, y el mesmu día del conciertu ente les 17 y les 20 hores, con precios populares de 10 euros pal patiu y 8 euros pal anfiteatru. Una oportunidá única pa disfrutar de la gran música sinfónica celebrando, al empar, ún de los llegaos más queríos del pueblu asturianu: la so cultura sidrera.
