- Fonte: LNE /
Uviéu ta de moda. Siquier eso canten los númberos. La memoria del serviciu municipal d’Estadística reflexa que l’añu pasáu camudarense a la capital del Principáu más xente que nunca. El padrón rexistró nel últimu exerciciu completu 14.749 altes, una cifra ensin precedentes que pulverizó l’anterior techu de la serie histórica, marcáu en 2007, cuando se contabilizaron 13.332 nuevos vecinos. La capital suma ya 226.773 empadronaos. La Corredoria, el barriu más populosu, con 20.248 habitantes.
Descontando les 10.698 baxes contabilizaes por distintos motivos (mudances, fallecimientos…), la ciudá ganó en solu dolce meses 4.051 vecinos, lo que supunxo la segunda crecedera demográfica más altu de la hestoria, solo superáu polos 4.133 habitantes ganaos fai 18 años, xusto primero qu’esplotara la burbuya inmobiliaria. Esta medría dexó qu’Uviéu algamara en febreru’l so récord históricu de población, 226.147 habitantes.
La imaxe d’Uviéu como «ciudá de les oportunidaes» paez dir más allá d’esti lema col que l’Alcalde, Alfredo Canteli, llantose en Madrid el pasáu 9 de xunu para estrenar una campaña promocional nos autobuses urbanos de la capital del reinu coles mires d’atraer turismu, actividá ya inversiones.
Estadística destaca que cada vez son más los madrilanos que deciden camudase a Uviéu. En concretu, l’añu pasáu fueron 845, frente a los 581 carbayones que s’empadronaron en Madrid, lo que dexa un saldu positivu de 264 nuevos vecinos, bien alloñáu de los númberos de finales de la década pasada, na que’l saldu yera favorable para Madrid n’una media averada de 200 habitantes al añu. L’aumentu del teletrabayu, el potencial del tirón turísticu para dar a conocer la calidá de vida de la ciudá y el bon momentu del mercáu llaboral son les claves que taríen detrás d’esti cambéu d’enclín.
Uviéu ta ganando aceptación tantu ente los estranxeros como ente la población d’otres rexones españoles. En total, llegaron al corazón del Principáu 4.701 persones d’otres autonomíes a lo llargo del pasáu añu. El mayor desembarco llegó dende Madrid, con 845 mudances nunca antes algamaes desque’l serviciu d’Estadística publica memories añales. Sicasí, l’enclín positivu yá empezó en 2023, cola mudanza de 795 nuevos vecinos dende la capital española, frente a los 606 vecinos d’Uviéu que buscaron un futuru meyor en tierres madrilanes.
Sicasí, la mayoría d’eses altes correspondieron a persones llegaes d’otros países. En total, fueron 5.311 los nuevos vecinos d’orixe estranxeru d’Uviéu, de los que más de 906 llegaron dende Colombia, 550 de Venezuela y 384 de Cuba. «La situación xeopolítica d’esos países ta siendo determinante por que munchos busquen un futuru n’España y Uviéu ye xuna bona elección», coinciden dende’l Conceyu.
A nivel internu d’Asturies, el pasáu añu llegaron a vivir a Uviéu 585 persones qu’hasta entós taben afincaes en Xixón y 492 procedentes de Siero.
Uviéu, de récord en récord de población: 420 habitantes más dende marzu y estos trés barrios crecen más que nengún
El tirón demográficu d’Uviéu sigue ensin tocar techu. La capital del Principáu cerró mayu con 226.773 vecinos, un nuevu récord históricu, dempués de sumar 420 empadronaos desque’l pasáu 31 de marzu estableciera la so última plusmarca de tolos tiempos. La mayor parte d’esti tirón poblacional débese a la llegada de nuevos residentes nacíos n’otros países.
Los datos publicaos el 31 de mayu pol padrón municipal evidencien una medría desigual nos distintos barrios de la ciudá. En concretu, reflexen que la área centro-norte lideró la llegada de nuevos vecinos, con 86 empadronaos más qu’en marzu, anque tamién destaca la medría de Ventanielles, a l’alza tres les reformes del bulevar de Santullano y el Palaciu de los Deportes, que suma 80 residentes, ente que Pumarín, Buenavista y La Florida consiguen engordar el so padrón en 70, 43 y 33 persones, respectivamente.
La Corredoria, el barriu más populosu. La Corredoria tamién encontia’l so títulu de barriu más populosu d’Uviéu. Fízose con 24 habitantes más, algamando los 20.248 y amenaciando con siguir ganando población.
Nel llau opuestu asítiase La Tenderina-Fozaneldi, onde se perdieron 37 vecinos en dos meses. Tamién vuelve cayer el parque d’Iviernu, una de les zones más avieyaes del cascu urbanu, onde se perdieron 19 empadronaos. Pando, con nueve persones menos, y Olloniego, La Manxoya y el centru-esti, pierden la llixera cifra de siete habitantes nel mesmu periodu.
Colonia estranxera creciente Lo que nun para de crecer ye la colonia estranxera. Uviéu empezó xunu con 24.052 vecinos foranos inscritos nel padrón, un llistón ensin precedentes na ciudá. Para faese una idea, nel conceyu hai más población d’orixe estranxeru que tolos vecinos de La Corredoria y l’Antiguu xuntos.
Esto debe en gran midida a la masiva llegada de suramericanos. La colonia colombiana sigui consolidándose como la más numberosa. Son yá 3.838 los carbayones nacíos nesi país. Sicasí, la que más crez ye la venezolana, integrada por 2.406 persones, qu’acaba de desbancar nel segundu puestu del ranking a la comunidá rumana (2.326).
L’equipu de gobiernu municipal atribúi esti aumentu de la población a la crecedera económica de la ciudá, dan por fechu que se va caltener esti enclín y afítense como próximu oxetivu superar los 230.000 habitantes.
