15 candidatures pa la xerencia nueva de la OSPA. La Orquesta Sinfónica del Principáu d’Asturies recibió 15 solicitúes pa ocupar la plaza de xerencia, una medría al respective de la convocatoria anterior. La comisión de valoración ta compuesta por representantes del Conseyu Rector y 5 profesionales del mundu musical.
La evaluación de méritos y proyectos, y les entrevistes individuales, van celebrase a finales de xunetu.
La propuesta final va presentala la conseyera de Cultura, Vanessa Gutiérrez, al Conseyu de Gobiernu.
Info: https://acortar.link/MRKHIV
L’actual convocatoria aprobóla’l Conseyu Rector de la OSPA el 9 de xunu del 2025 y publicóse nel Boletín Oficial del Principáu d’Asturies (BOPA) el día 18 del mesmu mes. Estes bases introducieron axustes cola mira d’ameyorar el procedimientu y reforciar el procesu selectivu.
La comisión de valoración ta formada polos mesmos miembros que na convocatoria anterior, 2 representantes del Conseyu Rector y 5 profesionales de prestixu reconocíu n’ámbitu de la música y la xestión cultural.
Los miembros del Conseyu Rector que formen parte d’esti xuráu son Antón García, director xeneral d’Acción Cultural y Normalización Llingüística, y Jaime Hidalgo, secretariu xeneral técnicu de la Conseyería de Cultura, Política Llingüística y Deporte. Tocante a les 5 persones de prestixu reconocíu, estes son: Encarna Rodríguez Cañas, quien foi xerente de la OSPA y conseyera de Cultura; Cosme Marina, director artísticu de la OFIL; Myra Pearce, profesora de la OSPA; Roberto Ugarte, xerente de la Euskadiko Orkestra; y Nieves Pascual, intendente de la Orquesta de Valencia.
De la mesma, la comisión yá definió’l calendariu de trabayu, estableciendo’l desenvolvimientu de la primer fase de méritos y la segunda de proyectu estratéxicu y de xestión pa últimos d’esti mes de xunetu. Les cinco candidatures con mayor puntuación van pasar a la tercer y última prueba, que va consistir nuna entrevista individual y por competencies, prevista tamién pa los últimos díes d’esti mes n’Uviéu.
Remataes les trés fases, los integrantes del mentáu comité evaluador van proponer al Conseyu Rector de la OSPA la candidatura con mayor puntuación global. Col informe favorable del Conseyu Rector, va ser la conseyera de Cultura, Política Llingüística y Deporte, Vanessa Gutiérrez, quien presente la propuesta al Conseyu de Gobiernu pal so nomamientu por decretu.
