Fonte: La Voz / NOTICIA SADEI/ Nota informativa (pdf)/ Info detallada
El gastu de les families asturianes, en máximos históricos: 2.616 euros al mes para cubrir necesidaes básiques. La vivienda y l’alimentación lleven la mayor parte d’un presupuestu nel que tan solo’l 5% de los ingresos dedíquense al ociu.
Los llares asturianos dediquen barganal d’un terciu del so presupuestu al gastu en vivienda incluyíos los suministros d’agua y enerxía— y alredor d’un 16% a alimentación y bebíes non alcohóliques. Asina s’esprende del analís realizáu pola Sociedá Asturiana d’Estudios Económicos ya Industriales (SADEI) a partir de los datos de la Encuesta de Presupuestos Familiares del Institutu Nacional d’Estadística (INE) correspondientes a Asturies. Unes cifres que señalen que’l gastu mediu añal por llar na rexón en 2024 algamó los 31.391 euros, lo que supon una medría del 2,3% respectu al añu anterior y marca un nuevu récord históricu desque empezó la serie estadística en 2006.
Dempués de la vivienda y l’alimentación, los principales desembolsos de les families asturianes concentrase en tresporte (11,6 %), restauración y agospiamientu (10,3 %), y en menor midida, en sanidá y ociu (5 % caúnu). Otres partíes destacaes fueron el gastu en ropa y calzáu (4,2 %), seguros y servicios financieros (4 %), curiáu personal y protección social (3,8 %), moblame y equipamientu del llar (3,5 %), telecomunicaciones ya información (3,3 %), bébores alcohóliques, tabacu y drogues (1,5 %) y, a lo último, educación (1,2 %).
Desglosao per meses, el consumu mediu por llar xubió a 2.616 euros. D’esta cantidá, 802 euros destinense a vivienda y suministros, 415 euros a productos alimenticios y bebíes non alcohóliques, 304 euros al tresporte y 270 euros a chigres, restoranes y agospiamientu turísticu. Estes cuatro categoríes representaron, en xunto, dos tercios del gastu mensual total.
Sanidá lidera l’aumentu del gastu.
Ente los distintos grupos de consumu, el que rexistró una mayor medría foi’l de sanidá, con un aumentu añal de 339 euros per llar, lo que supon una xubida del 27,8 %. Siguiéron-y les actividaes d’ociu, cultura y deporte, con 248 euros más al añu (+18,5 %), y los gastos acomuñaos a vivienda, agua y enerxía, que s’amontaron en 235 euros (+2,5 %).
Anque menos relevante en términos absolutos, el gastu n’educación creció un 46,3% respectu al añu anterior, con un aumentu de 119 euros añales por llar. Nel llau contrariu, el mayor retrocesu danse n’alimentación y bebíes non alcohóliques, con 251 euros menos por llar (-4,8 %), rompiendo col enclín ascendente d’exercicios previos. Tamién s’amenorgó’l gastu en cuidos personales y protección social, con un descensu de 188 euros (-13,5 %).
