El llobu ibéricu (Canis lupus signatus) ye una subespecie de llobu reinal de la península ibérica. La so proximidá filogenética con otres poblaciones de llobu européu llevó a munchos zoólogos fora de la península ibérica a incluyilo dientro de la subespecie nominal C. l. lupus.
Anatómicamente ye un llobu de tamañu mediu; los machos algamen hasta setenta centímetros d’altor y cincuenta kilogramos de pesu. La pelame tien llurdios escuros na cola, parte anterior y cruz que dieron nome a la subespecie.
Anque históricamente distribuyíase abondosamente por tola península ibérica, en 2018 caltiense con poblaciones relativamente estables al norte del Duero, ente que al sur la so población ye fráxil y ta estazada.
