El Principáu activa mañana la descarga de los bonos de turismu rural, con descuentos d’hasta 75 euros per dos nueches d’agospiamientu na seronda. Los cupones funcionen como tickets prepagu y pueden descargase dende la web https://bonosturismoruralasturias.com/ para estancies ente’l 16 de setiembre y el 31 d’avientu. Los establecimientos tienen de plazu hasta’l 29 de xunetu pa xuntase al programa.
El Gobiernu d’Asturies va poner en marcha mañana, día 25 de xunetu, el nuevu programa de bonos de turismu rural, una iniciativa diseñada pa incentivar les estancies n’agospiamientos d’esti tipu mientres la temporada media y baxa. La midida, alcordada col sector, busca atraer visitantes, dinamizar la economía local y siguir construyendo un modelu turísticu más equilibráu y sostenible.
Los bonos van poder descargase a partir de mañana dende la web oficial del programa: https://bonosturismoruralasturias.com/
Con una inversión de 600.000 euros del presupuestu autonómicu d’anguaño, la iniciativa va dexar la emisión de barganal de 8.000 bonos dixitales, que van ufiertar un descuentu directu de 75 euros en reserves de dos nueches consecutives a lo menos. Los bonos funcionen como tickets prepago, cofinanciaos a partes iguales pola persona usuaria y el Principáu.
Los vales van presentase en formatu dixital y podrán guardase nel móvil por aciu un códigu QR compatible con aplicaciones tipo wallet. Cada persona va poder beneficiase d’un máximu de dos bonos.
Nel casu de cases d’aldega de contratación íntegra o apartamentos rurales, va dexase l’usu de dos cupones nuna mesma reserva, siempres que se contraten siquier cuatro places.
El periodu pa esfrutar de los descuentos va estendese del 16 de setiembre al 31 d’avientu. Pa ello, va ser necesariu realizar la reserva en dalgún de los agospiamientos rurales xuntaos al programa. El plazu de participación pa los establecimientos va permanecer abiertu hasta’l 29 de xunetu, incluyíu.
El Gobiernu del Principáu articuló, amás, xuna campaña de promoción pa sofitar l’espardimientu de los bonos y potenciar el consumu nel sector rural, un turismu que nació precisamente n’Asturies.
Con esta iniciativa, l’Executivu autonómicu cumple’l compromisu adquiríu con esti sector, col que ta dafechu comprometíu, y refuerza el so apueste pola desestacionalización, l’atracción de nuevos públicos y la puesta en valor del territoriu como un destín calidable en cualquier dómina del añu.
¿Qué ye’l Bonu Turismu Rural Asturies?
¿Te imaxines espertar arrodiáu de montes, alendar aire puro y desconectar del mundu en plena naturaleza asturiana? Col Bonu Turismu Rural d’Asturies ye posible… ¡Y más fácil que nunca! Consigue’l to bonu dixital de 150 € por solu 75 €, gracies a la cofinanciación cola Alministración, y esfrútalo n’agospiamientos rurales.
Puedes usar hasta dos bonos per persona y añu, combinalos en reserves para grupos, y partir el gastu como prefieras, siempres que cada estancia sía de siquier dos nueches. ¡Ye la to oportunidá para vivir Asturies de forma auténtica, natural y a un preciu irresistible! Non dexes pasar esta esperiencia única: activa’l to bonu y déxate llevar pol turismu rural como nunca lo vivieres.
