Cazorla yá ye fíu adoptivu d’Uviéu: «Ye un referente de trabayu, humildá, identidá, ambición y arguyu de pertenencia». El conceyu de la capital destaca que «ensin nacer n’Uviéu, ye uvieina d’alma y corazón». La Voz
El plenu del Conceyu d’Uviéu aprobó, por unanimidá, nomar al futbolista del Real Uviéu Santi Cazorla fíu adoptivu de la ciudá, como «reconocencia al so llabor como deportista y como ciudadanu exemplar» y pola so aportación decisiva» al ascensu del Real Uviéu a Primer División.
L’alcuerdu adoptáu destaca del futbolista la so trayectoria profesional, «marcada pola excelencia y la superación», según la so calidá humana» y el fechu de que sía «un referente de los valores qu’esta ciudá quier proxectar» de «trabayu, humildá, identidá, ambición y arguyu de pertenencia».
«Otorga-y esta distinción nun ye namá un actu de xusticia sinón tamién una reconocencia pública al exemplu que representa y una manera d’espresar l’agradecimientu de too un pueblu a daquién que, ensin nacer n’Uviéu, ye uvieín d’alma y corazón», destacó’l Secretariu Xeneral del Plenu.
Cazorla ye, según la corporación local, «exemplu vivu de los valores que más dignifiquen al deporte y a la sociedá», con «la humildá, l’esfuerzu, la honestidá, el compromisu colos demás y la fidelidá a los mesmos oríxenes»,
