Cultura convoca ayudes para promover l’actividá física en zones rurales por aciu la meyora d’espacios deportivos. La convocatoria, dotada con más de 80.000 euros y financiada con fondos europeos Next Generation, dirixise a conceyos de menos de 20.000 habitantes. Actualidá Asturies
La Conseyería de Cultura, Política Llingüística y Deporte promueve l’actividá física nel mediu rural por aciu la convocatoria d’una llínea d’ayudes pa la meyora d’espacios deportivos destinada a conceyos con menos de 20.000 habitantes. El plazu pa presentar ufiertes termina’l próximu 8 d’agostu, y tola información puede consultase nel siguiente enllaz:
L’oxetivu d’estes subvenciones, dotaes con 80.000 euros procedentes de los fondos europeos Next Generation, ye promover la práctica deportiva nel mediu rural por aciu la creación de la Rede Coordinada de Promotores de l’Actividá Física nes Zones Rurales (Rede Pafer). Cada consistoriu va poder llograr, a lo más, 16.025 euros per proyectu, que se van destinar a financiar actuaciones realizaes ente’l 1 de xineru y el 30 d’ochobre d’anguaño.
Esta llínea de subvenciones enmárcase dientro del compromisu del Principáu por facilitar l’accesu universal a vezos de vida saludables y a reforzar el papel de los espacios comuñales como puntu d’alcuentru y bienestar nel mediu rural.
