Cultura abre la consulta pública pa definir les bases nueves de les ayudes a la industria del cine y del audiovisual. Hasta’l 22 de xunetu, la ciudadanía y los sectores vinculaos pueden mandar les sos aportaciones. Actualidá Asturies
La Conseyería de Cultura, Política Llingüística y Deporte abrió un periodu de consulta pública previa pa la ellaboración de les bases reguladores nueves de subvenciones destinaes a profesionales y empreses del sector cinematográficu y audiovisual. Esta iniciativa, impulsada pol departamentu que lidera Vanessa Gutiérrez, tien como oxetivu adaptar el marcu normativu a la evolución del sector y ameyorar la eficacia de les ayudes públiques.
La consulta va tar abierta hasta’l 22 de xunetu y les aportaciones van poder mandase al corréu electrónicu participa@asturias.org. Esta fase participativa va dexar recoyer opiniones y propuestes primero de redactar el borrador de la norma, en llinia coles directrices de participación ciudadana del Principáu.
Les bases nueves busquen fomentar y cofinanciar actividaes como la producción audiovisual, la escritura de guiones, l’asistencia a festivales, la organización de certámenes, los llaboratorios y incubadores de creación, el desenvolvimientu de proyectos, o’l sofitu a sales d’exhibición, ente otres. La regulación enmárcase nel compromisu del Executivu autonómicu col impulsu d’un sector estratéxicu pa la cultura y la economía asturiana.
Tola información rellacionada cola consulta pública previa pue consultase nel enllaz https://tinyurl.com/2th3dxpw
Un ecosistema audiovisual n’espansión
El Principáu ta desenvolviendo un plan ambiciosu pa convertir la comunidá nun polu cinematográficu de referencia nacional y internacional. El proyectu contempla la creación d’una Escuela de Cine, infraestructures de rodaxe, talleres técnicos y un estudiu de postproducción con tecnoloxía de vanguardia.
Amás, el Gobiernu asturianu presentó al Ministeriu de Cultura la propuesta pa la creación del Observatoriu del Curtiumetraxe, con sede n’Asturies. Esti organismu va empobinase al caltenimientu, análisis y espardimientu del curtiumetraxe español, integrando a instituciones y profesionales nuna rede de cooperación nacional y internacional.
L’Asturies Paraísu Natural Film Commission sigue tamién el so llabor d’atracción de rodaxes y promoción del territoriu como plató natural, consolidando la comunidá autónoma como un destín d’interés pa producciones audiovisuales.
Nesti sentíu, Asturies consolidóse como ún de los destinos emerxentes de más interés pa los rodaxes internacionales, depués de captar nel 2024 una inversión estranxera cercana a los trés millones d’euros, según l’informe anual de Profilm, presentáu apocayá en Barcelona. El documentu asitia al Principáu como la octava comunidá autónoma con mayor captación de fondos internacionales.
