David Giménez, nómada: «Viví en paraísos del mundu y el norte d’España puede comparase en belleza». David Giménez tien 31 años, ye de Salou y ta faciendo’l retu de bordiar a cuerpu tola Península Ibérica, lo que lu llevó a afayar Asturies estos díes. La Voz d’Avilés/ @elretodedavid
David Giménez Ramos tien 31 años, ye de Salou y ta llevando a cabu’l retu más ambiciosu de tola so vida y unu que prácticamente naide igualó. Esti mozu catalán propúnxose bordiar tola Península Ibérica caminando, más de 5.000 kilómetros que lu van llevar a percorrer tola mariña d’España y Portugal nuna aventura que yá la ta camudando la vida y que estos díes dexó-y conocer Asturies y unes paraxes naturales que lu impresionaron.
L’aventura empezó’l pasáu 18 de mayu. «Siempres me gustó enforma l’aventura y odiu la rutina. Trabayaba por temporaes, pel hibiernu nuna estación d’esquí y pel branu nuna discoteca de Salou, pero l’añu pasáu viví una temporada n’Australia y n’Indonesia y cuando se m’acabó’l visáu y tuvo que volver a España tenía claro que nun quería siguir cola mesma vida de siempre. Ende foi cuando pensé que quería faer un retu y conoceme más a mi mesmu y de camín el país», esplica esti «caminante», como él mesmu defínese.
Esti vienres pasó la nueche n’Avilés y a pesar de qu’inda-y queda por percorrer la metá d’Asturies, tien bien clara la so idea sobro esta tierra qu’antes-y yera desconocida. «Viví en paraísos del mundu como Australia ya Indonesia y puedo dicir que’l norte d’España puede comparase en guapura ensin dala dulda. Asturies tien paisaxes que paecen de postal».
Enagora aprovechó al máximu’l so pasu per tierres asturianes. Nel so camín conoció llugares como Llanes, Tazones, Salinas y Avilés. Tamién aprovechó pa faer el descensu del Sella en canoa o ver una puesta de sol nel Cabu Peñes que m’impresionó y emocionó».
Lo cierto ye que la so aventura ta atrayendo l’atención de miles de siguidores que siguen cada etapa al traviés de les sos redes sociales, onde apaez como @elretodedavid, poles que documenta cada esperiencia. «La xente ye increíble, ayúdenme, avérenme comida, acompáñenme en tramos de les mios etapes n’inclusive m’ufierten agospiamientu como un mozu d’Avilés», estima’l mozu. Tamién s’entornaron con él empresarios asturianos, como la quesería Gorfolí d’Illas o Embutíos Vallina, n’Avilés, que-y enseñaron les so instalaciones y emprestáron-y ayuda.
Un retu llenu de torgues. Esta ruta de miles de kilómetros empezó fai yá dos meses en Salou y punxo aldu al norte coles idees bien clares. «El plan yera pasar los meses de branu nel norte y que la seronda y l’iviernu píllenme nel sur dempués de cruciar Portugal. Nun principiu tenía pensáu terminar p’avientu, pero agora calculo que va ser más pa finales de xineru del añu que vien», esplica David Giménez.
Lo cierto ye que nun se cinxe a etapes zarraes, «si veo una sablera o un cabu que me gusten o dalgún sitiu que m’encamienten, pos esvio ensin problema». Ta caminando una media de 30 kilómetros al día y enagora lleva unos 1.400 kilómetros a los sos llombos.
El camín nun lu fai solo, eso sí. Ta acompañáu en tou momentu por ‘Charlie’, que ye’l nome que lu punxo a una particular mochila con ruedes que cada mañana s’arreyar a la cintura y na que lleva tou lo que precisa pa sobrevivir. Ye ciertu que l’aventura nun ta siendo senciella. Tien un presupuestu d’unos 10 euros al día y tuvo que faer etapes enfermu o mancáu. Agora quéda-y por percorrer la metá d’Asturies, polo que ye fácil que se-y vea poles coses asturianes.
