El 73,6% de los asturianos prefieren empezar la so carrera llaboral como emplegaos por cuenta ayena. El 13,6 por cientu de los universitarios asturianos tán arreyaos na creación de dalguna empresa, un porcentaxe que ta cuasi cuatro puntos per debaxo de la media nacional, que ye del 17,5 por cientu, según los datos del últimu informe ‘Guesss’, un acrónimu que n’asturianu significa Encuesta Global del Espíritu Entamador Universitariu.
Les resultancies del documentu, ellaboráu pola Cátedra d’Emprendimientu de la Universidá d’Uviéu y la Fundación Caxa Rural d’Asturies, fueron presentaos nuna rueda de prensa a la qu’asistieron el rector de la Universidá, Ignacio Villaverde; la directora de la Fundación Caxa Rural d’Asturies; Eva Pando; la directora técnica de Guesss Asturies, Vanessa Solís, y los entamadores Guillermo Vigil Rodríguez y David Varela Pérez.
Solís afirmó que los datos llograos tres encuestar a cerca de 1.900 universitarios, son llixeramente inferiores a la media nacional, pero «positivos» al respective d’anteriores informes, qu’ufierten datos sobro la intención d’emprendimientu de los universitarios, cuántos entamaron yá, cuáles son les causes qu’atopen tres estes motivaciones y cuáles son los factores continxentes.
