El Gobiernu del Principáu suscribe colos sindicatos el pactu ‘Asturies Educa’, la fueya de ruta para fortalecer la escuela pública qu’implica una inversión de 45 millones. El presidente valora’l conteníu del documentu y estima la disposición de les organizaciones sindicales para cerrar l’alcuerdu que punxo fin a les movilizaciones nel sector.
“Adelántro-yos que’l presupuestu de 2026 va ser, con mayúscules, el presupuestu de la educación pública”, asegura Adrián Barbón
El presidente del Principáu, Adrián Barbón, encabezó güei la firma del pactu Asturies Educa, la fueya de ruta que va dexar fortalecer la escuela pública nos próximos años y qu’implica 45 millones d’inversión. “Para’l mio Executivu, para’l gobiernu de progresu d’Asturies, ye un pactu d’obligáu cumplimientu que namá va almitir cambeos para reforzalo”, aseguró’l xefe del Executivu.
La conseyera d’Educación, Eva Ledo, suscribió esta mañana’l documentu con Gumersindo Saiz, de Anpe Asturies, Borja Llorente, de CC.OO. d’Enseñanza; Miguel Laria, de Suatea y Cristóbal Ponte, de UGT Servicio Públicos. La robla va dexar impulsar l’alcuerdu alcanzáu ente’l Principáu y les organizaciones sindicales que punxo fin a les movilizaciones de la comunidá educativa’l pasáu mes de xunu.
Ente otros aspeutos, el testu recueye los siguientes compromisos:
– L’aumentu del profesoráu, con 300 nuevos especialistes en pedagoxía terapéutica y audición y llinguaxe.
– L’aceleración del amenorgamientu del alumnáu por aula, hasta un máximu de 23.
– La medría de les retribuciones, que nel profesoráu con menos de seis años d’esperiencia va llegar a los 210 euros mensuales.
– L’axilización de les sustituciones.
– L’aplicación del Plan Simplifica Educación, pa descargar de xeres burocrátiques al profesoráu.
– La nueva regulación de les baxes médiques, que va garantizar el cobru del cien per cien del sueldu al personal docente.
