El viceconseyeru d’Infraestructures y Movilidá Sostenible, Jorge García, y el director xeneral de Patrimoniu Cultural, Pablo León, recibieron a El Vaporín nel puertu de San Esteban. El míticu remolcador vuelve a Asturies gracies al protocolu firmáu ente Cultura, Industrias Ferri y el Conceyu de Muros de Nalón. 
Nes fiestes del Carme (15 y 16 de xunetu), podrás embarcate y percorrer la Ría del Nalón a bordu d’esti símbolu del patrimoniu marítimu asturianu. 
Historia, emoción y memoria colectiva nun viaxe únicu.
La Conseyería de Cultura, Política Llingüística y Deporte, el Conceyu de Muros de Nalón ya Industries Ferri suscribieron un protocolu de collaboración por que el emblemáticu remolcador San Esteban, más conocíu como ‘El Vaporín’, torne esti xueves, de Galicia a Asturies por que la ciudadanía pueda esfrutar d’él mientres les tradicionales fiestes del Carmen, los díes 15 y 16 de xunetu.
Según informó esti miércoles el Gobiernu asturianu, el protocolu sienta les bases para garantizar la participación estable del barcu nes celebraciones, según la so integración n’actividaes culturales y turístiques del conceyu.
Construyíu en 1902 nos estelleros Philip & Son de Dartmouth (Inglaterra), ‘El Vaporín’ empezó la so vida como pesqueru sol nome Venture. En 1907 foi reconvertíu en remolcador pola Sociedá Xeneral de Ferrocarriles Vascu-Asturiana y destináu al puertu de San Esteban, onde tuvo un papel clave na esportación de carbón hasta la so retirada en 1970.
Cultura firma un protocolu con Industrias Ferri y Muros de Nalón pa recuperar El Vaporín nes fiestes de San Esteban
- L’alcuerdu prevé tamién, ente otres midíes, llevar a cabu acciones de divulgación orientaes a poner en valor el patrimoniu históricu del remolcador
- Nes fiestes patronales, locales y visitantes van poder saliase pela Ría del Nalón a bordu d’esi barcu emblemáticu que ta previsto que llegue mañana xueves a Asturies
La Conseyería de Cultura, Política Llingüística y Deporte, el Conceyu de Muros de Nalón y Industrias Ferri S. A. soscribieron un protocolu de collaboración que va propiciar mañana la vuelta a Asturies d’un remolcador tan emblemáticu como’l San Esteban, más conocíu como El Vaporín, cola mira de que la ciudadanía pueda disfrutar d’él nes fiestes tradicionales del Carme, los díes 15 y 16 de xunetu.
El protocolu sienta les bases pa garantizar la participación estable del barcu nes celebraciones, amás de la so integración n’actividaes culturales y turístiques del conceyu, tal y como valoraron la conseyera de Cultura, Política Llingüística y Deporte, Vanessa Gutiérrez; l’alcalde del conceyu mentáu, Celestino Novo; y Jesús González-Aller en representación d’Industrias Ferri, nel trescursu de la reunión onde se destacó la importancia d’esti alcuerdu.
“Esti alcuerdu ye una muestra del compromisu conxuntu y de la importancia de la collaboración público-privada pa salvaguardar y compartir un símbolu del patrimoniu y de la identidá marinera”, sorrayó la conseyera, quien amás quixo destacar cómo la vuelta del barcu “ye un actu de reivindicación de la historia y la memoria colectiva de San Esteban: recuperar el Vaporín ye celebrar el rellatu compartíu poles distintes xeneraciones que vivieron con esti barcu ancláu nel horizonte más inmediatu”.
El protocolu contempla, ente otres midíes, el treslláu anual del barcu dende’l so allugamientu actual en Galicia hasta’l puertu de San Esteban, amás de la organización de paseos abiertos al públicu mentes son les fiestes. Tamién prevé acciones de divulgación orientaes a poner en valor el patrimoniu históricu del remolcador y el compromisu d’ufiertar a les alministraciones firmantes un derechu preferente d’adquisición nel casu de que se proponga la so venta futura.
Una esperiencia abierta a la ciudadanía
El protocolu va tener una vixencia de mano de dos años, prorrogables, y incluye la creación d’una comisión mista de siguimientu pa coordinar les actuaciones, facilitar la organización d’actividaes y resolver posibles incidencies.
A lo llargo de les fiestes patronales, locales y visitantes van poder embarcase nel remolcador y percorrer la Ría del Nalón, nun viaxe cargáu d’historia y cultura. La procesión marinera, ún de los actos más esperaos, va cuntar asina cola presencia destacada d’El Vaporín, zarrando un círculu ente pasáu, presente y futuru.
Un símbolu del patrimoniu marítimu asturianu
Construyíu nel 1902 nos astilleros Philip & Son de Dartmouth (Inglaterra), El Vaporín empezó la so vida como pesqueru col nome Venture. En 1907 reconvirtiólu en remolcador la Sociedá Xeneral de Ferrocarriles Vasco-Asturiana y destinólu al puertu de San Esteban, onde xugó un papel clave na esportación de carbón hasta la so retirada en 1970. Desque lu adquirió’l grupu Ferri, el barcu sometióse va poco a otres meyores y a la so restauración.
