- Alborecemos con nubosidá baxa y delles nublines pela costa, tando escampláu pela cordelera con unes temperatures que tan alrodiu de los 18ºC, rexistrándose nel puirtu Payares 12,5ºC.
- Güei pali que pali van dir dixebrándose los borrinos y nublines del alborecer pa dexanos un día soleyeru y perguapu con unes temperatures n’ascensu que sedrá más acusáu nel interior. Al atapecer tornará la nubosidá estratificada a la fastera central asturiana y ye mui probable que tengamos nublines d’advención na primer llinea de costa que puen ser persistentes na fastera más ocidental y menos probables alrodiu del cabu Peñes. L’aire sedrá sele en xeneral de componente norte.
- Mañana domingu vamos tener dalguna nube más, sobre too pel llitoral ocidental, abriendo’l día nel restu mentantu alrodiu la cordelera van tener el cielu escampláu con unes temperatures en llixeru descensu. Al atapecer aumentará la nubosidá y mos dexará col camudu’l día precipitaciones en forma d’orpín.
- El llunes va tar el cielu mui nuboso con precipitaciones febles pela mañana, amás les temperatures descenderán moderadamente y l’aire sedrá de componente norte.
- L’alborecer del martes toca chaquetina, les temperatures van baxar hasta los 12-13ºC na mayor parte d’Asturies anque dempués la llume del sol calecerá l’ambiente y paez que tendremos una selmana seliquina y braniega.
