Les esportaciones asturianes marquen un nuevu récord en mayu magar la guerra arancelaria y l’inestabilidá xeopolítica. Les empreses vendieron productos y servicios per valor 534,5 millones, el meyor rexistro no que va d’añu. Un total de 606 compañíes del Principáu caltienen relaciones comerciales de manera habitual con otros países.
Les esportaciones asturianes marquen un nuevu récord en mayu magar la guerra arancelaria abierta per Estaos Xuníos (EE.XX.) y l’inestabilidá xeopolítica mundial. Los datos que remana Asturex amuesen que les empreses de la comunidá vendieron al esterior nesi mes productos y servicios per valor de 534,5 millones, el meyor rexistro dende xineru.
- Estes cifres suponen un aumentu del 3% al respective de abril y del 0,3% en comparanza con mayu de 2024.
- El balance de mayu alza’l valor de les esportaciones acumulaes dende principios d’añu a 2.374,4 millones, esto ye, 104,1 más que’l volume d’importaciones. Poro, Asturies caltienen un saldu positivu nos intercambios comerciales col esterior.
El director xeneral de la Sociedá de Promoción Esterior del Principáu (Asturex), Bruno López, valoró estes resultancies nun contestu xeopolítico y económicu complexu para les empreses que caltienen relaciones comerciales col estranxeru. N’especial, López destacó la evolución de les compañíes esportadores regulares, qu’en mayu llegaron a 606.
Por productos, el cinc y la partida de fierro, fundición y aceru concentren los mayores volumes d’esportaciones, magar sobresalen dos medríes: el 27,65% nes vientes de productos lácteos y güevos y el 175,1% en productos químicos orgánicos.
Tocantes a los países de destín de les vientes, Francia, Italia y Portugal caltiénense, un mes más, como los trés principales socios comerciales del Principáu. Italia, pela so parte, rexistra una medría del 35,3% nel acumuláu de los cinco primeros meses, ente que Brasil caltien una espectacular crecedera del 248,1%.
Intercambios con Estaos Xuníos. Per otru llau, nun se reparen variaciones significatives na relación comercial ente Asturies y Estaos Xuníos. Nos cinco primeros meses del añu les vientes amenorgaron un 25,12%, hasta los 83,4 millones, pol descensu de les esportaciones de manufactures de fundición, fierro y aceru, árees nes que se concentra la guerra arancelaria de Donald Trump.
“Nun se repara xuna cayida xeneralizada en tolos productos, salvo nestes manufactures, que’l so descensu puede tar rellacionáu cola guerra arancelaria y los planes de l’Alministración Trump coles enerxíes anovables”, esplicó López.
