Ye una medría del 58% en menos de cinco años. L’estudiu de Regiolab, d’Ana Salomé García, esplica que n’Asturies nun hai un únicu modelu de turismu de viviendes vacacionales. Nel oriente, dellos conceyos yá presenten nicios de saturación y l’enclín ye al alza.
Lo qu’a nivel autonómicu paez una evolución controlada, esplica, a nivel local pue llevar a dinámiques de tensión pudiendo llegar a comprometer la sostenibilidá habitacional.
- El patrón asitia’l focu de la crecedera nel área rural y costera, mientres que ciudaes como Uviéu, Xixón y Avilés presenten valores entá conteníos, inferiores al 1%.
- Per otru llau, hai conceyos onde’l porcentaxe cayó de forma notable. En Santalla d’Ozcos, por casu, raspiaba’l 5 en 2020 y agora ta nel 2,5. Lo mesmo n’Amieva, Castropol o Somiedu.
- L’estudiu menta conceyos con poca incidencia como Llangréu, Llaviana o Grau, o inclusive mui escasa o nulos, como Tameza, Riosa o Cuideiru. Esto pue ser tomao como una oportunidá pa potenciar el turismu ensin cayer n’errores de sobresplotación.
N’España, una Vivienda d’Usu Turísticu (VUT) ye a una propiedá residencial que s’arrienda a turistes por períodos curtios, xeneralmente inferiores a 31 díes. Estes viviendes tienen de tar amoblaes y forníes para’l so usu inmediatu y cumplir con ciertos requisitos llegales y de seguridá, que pueden variar según la comunidá autónoma. A diferencia de los apartamentos turísticos (AT), les VUTs suelen ser xestionaes directamente polos propietarios o al traviés d’empreses especializaes.
