Esta ye la imaxe d’Asturies qu’apaez nel Atles de Xeografía d’España» de Luis Mallafré (Editorial Roma, Barcelona), que los escolares teníen que colorear para aprender la xeografía española. La primer edición ye d’escontra 1925 (inda apaez Cangas de Tinéu, que camudó en 1927 a Cangas), pero siguió editándose hasta los años cuarenta.
Reparái los productos que representaben naquel tiempu la producción asturiana, dalgunos yá pasaron a la hestoria (lloza, hulla). Ente ellos apaez el maíz y recordámosvos la esposición «Tierra de maíz. La presencia del maíz na fotografía asturiana, 1890-1990», qu’acabamos d’inaugurar nel muséu. Esti atles acaba d’ingresar nel muséu coloriáu por una neña asturiana.
