Más de 50 obres donaes por artistes locales y internacionales. Acuareles, olios, escultures o fotografíes son dalgunes de les pieces artístiques que los visitantes al Antiguu Balneariu de Borines puen esfrutar dende güei hasta principios de setiembre. Artistes locales y internacionales que busquen, al traviés del arte, collaborar na meyora del centru cultural La Benéfica de Piloña.
Una serie de colax llegaos dende Canadá, una escultura con nome mitolóxicu o una pintura con mensaxes son dalgunes de les obres que se puen mercar por un preciu que va de los cinco a los 4.000 euros. La Benéfica y Borines Cultura collaboren nesti eventu con muncha presencia artística. Los beneficios que se llogren de les ventes van dir destinaos, la metá, a los artistes y, la otra parte, a la rehabilitación y equipamientu de La Benéfica de Piloña.
