RTPA /
Un grupu de trabayu multidisciplinar va coordinar l’acciones en seguridá, educación, salú, turismu y divulgación científica. El Gobiernu d’Asturies dio esti martes el pistoletazu de salida a los preparativos para l’eclís total que se va producir el 12 d’agostu de 2026, con motivu del cual la conseyería de Ciencia va crear un grupu de trabayu multidisciplinar que va coordinar l’acciones en seguridá, educación, salú, turismu y divulgación científica mientres el próximu añu.
El conseyeru de Ciencia, Borja Sánchez, presentó na Feria Internacional d’Amueses d’Asturies (Fidma), en Xixón, el plan de trabayu que’l Principáu va activar de momentu, qu’anunció nel marcu d’una xornada científica que cuntó cola participación de les astrofísiques Noemí Pinilla-Alonso y Lucía González.
Trátase d’un fenómenu estraordinariu, cuidao que España va ser l’únicu país habitáu nel que podrá reparase na so totalidá, y Asturies atópase n’una posición privilexada: n’Uviéu, por casu, envalórase que l’eclís va durar un minutu y 48 segundos, el máximu en tol territoriu nacional.
Asturies va collaborar estrechamente col Gobiernu d’España, que va constituyir nos próximos díes una comisión interministerial para coordinar el llamáu tríu d’eclises de 2026, 2027 y 2028, sorrayó’l Principáu.
Estos fenómenos atraen a miles de persones, polo que’l Principáu prepara un programa d’actividaes en collaboración cola Delegación del Gobiernu, la Federación Asturiana de Conceyos y espertos n’astronomía.
Ente les iniciatives previstes destaca la ellaboración d’un mapa de puntos d’observación seguros, distribuyíos por tol territoriu, que van garantizar servicios fayadizos, van evitar aglomeraciones y van facilitar la movilidá.
La salú ocular va ser una prioridá, cuidao que reparar l’eclís ensin protección fayadiza puede causar daños graves en la vista, polo que se van desenvolver campañes educatives en centros escolares, con talleres y materiales específicos a lo llargo del cursu.
La divulgación científica y el turismu astronómicu van ser tamién exes fundamentales del programa. Asina, va cuntar cola collaboración d’entidaes rexonales como’l proyectu Ayande Stars, que la so directora, Lucía González, esplicó les claves pa esfrutar del eclís de forma segura y dalguna de les actividaes que van averar l’eventu a la ciudadanía.
Nel actu celebráu na Fidma activóse simbólicamente la cuenta trás pal eclís, que se va producir el 12 d’agostu de 2026 sobro les 20:30 hores, con llixeres variaciones según la localidá.
Con motivu del eclís, el Principáu va entamar xuna conferencia internacional sobro la nueva yera de la esploración espacial, so la dirección científica de Noemí Pinilla-Alonso, con ponentes de prestíu internacional que van encetar temes como la salú espacial, la defensa planetaria, la robótica y los materiales avanzaos.
