Asturies escapa de la fola de calor, pero va algamar los 35 graos. El Principáu, al pie de Canaries, únicos puntos del país qu’eviten los avisos de l’Aemet.
Solo Asturies y Canaries escapen de la fola de calor, la segunda del branu, que pon n’alerta a más d’una trentena de provincies por temperatures d’hasta 42 graos, según la previsión de l’Axencia Estatal de Meteoroloxía (AEMET). Anque nel Principáu nun s’activaron los avisos por calor, sí espérense altes temperatures que nel suroccidente pueden llegar a los 35 graos.
- Asina, en Cangas esperen máximes de 34 graos esti llunes. Los termómetros tamién van algamar los 30 graos en Llangréu, ente que n’Uviéu van quedase nos 29.
- En puntos de la mariña asturiana como Xixón o Llanes, les temperatures van bazcuyar ente los 26 y los 27, al igual que n’Avilés, mientas qu’en Navia’l termómetru va marcar unos 24 graos.
- Mientres tola selmana, el sol va ser el protagonista n’Asturies, con temperatures propies del branu, anque nun se refuga dalgún orbayu’l martes pela tarde na mariña.
Encamientos contra’l calor. La conseyería de Salú del Principáu d’Asturies emitió xuna serie d’encamientos énte altes temperatures, baltes como caltener una fayadiza hidratación, consumir comíes llixeres y evitar bébores con cafeína o alcohol.
Amás encamienten protexer especialmente a ñácaros, persones mayores y grupos vulnerables. Coles mesmes, aconseyen permanecer en llugares frescos y amenorgar l’actividá física, especialmente nes hores centrales del día.
En relación a les actividaes acuátiques, Salú remarca la importancia de bañase en zones habilitaes y xixilaes, cumpliendo siempres colos encamientos del personal de salvamentu. Este mesmu llunes, el Serviciu d’Emerxencies del Principáu d’Asturies aconseyó a la población estremar los precuros na mariña asturiana énte la proliferación d’aguamales y carabeles portugueses nes sableres.
Pa quien practiquen actividaes de monte, Salú encamentó planiar con antelación les rutes, informase del tiempu, llevar equipu fayadizu y agua, salir acompañáu y estremar los precuros énte posibles cambeos meteorolóxicos.
