Ciencia empecipia los preparativos para convertir Asturies en referencia internacional para la observación del eclís solar total de 2026. La conseyería va crear un grupu de trabayu, en collaboración col Gobiernu d’España, para coordinar el mayor eventu astronómicu del sieglu. El Principáu va entamar un alcuentru con espertos de la NASA y organismos científicos para impulsar la industria espacial na comunidá.
L’Executivu va ellaborar un mapa de llugares seguros para facilitar la contemplación d’esti fenómenu.
El Gobiernu d’Asturies dio güei el pistoletazu de salida a los preparativos para l‘eclís total que se va producir el 12 d’agostu de 2026, unu de los eventos astronómicos más relevantes del sieglu. La conseyería de Ciencia, Industria y Empléu va crear un grupu de trabayu multidisciplinar que va coordinar l’acciones en seguridá, educación, salú, turismu y divulgación científica mientres el próximu añu.
Trátase d’un fenómenu estraordinariu, cuidao que España va ser l’únicu país habitáu nel que podrá reparase na so totalidá. Asturies atópase n’una posición privilexada: n’Uviéu, por casu, envalórase que l’eclís va durar un minutu y 48 segundos, el máximu en tol territoriu nacional.
El conseyeru de Ciencia, Borja Sánchez, presentó güei na Feria Internacional d’Amueses d’Asturies (Fidma) el plan de trabayu que’l Principáu va activar de momentu. La presentación llevóse a cabu nel marcu d’una xornada científica que cuntó cola participación de les astrofísiques Noemí Pinilla-Alonso y Lucía González Cuesta.
Asturies va collaborar estrechamente col Gobiernu d’España, que va constituyir nos próximos díes una comisión interministerial para coordinar el llamáu tríu d’eclises de 2026, 2027 y 2028. Nel casu d’Asturies, el focu va tar nel de 2026, l’únicu visible dende la comunidá.
Estos fenómenos atraen a miles de persones, polo que’l Principáu prepara un programa d’actividaes en collaboración cola Delegación del Gobiernu, la Federación Asturiana de Conceyos y espertos n’astronomía. Ente les iniciatives previstes destaca la ellaboración d’un mapa de puntos d’observación seguros, distribuyíos por tol territoriu, que van garantizar servicios fayadizos, van evitar aglomeraciones y van facilitar la movilidá.
La salú ocular va ser xuna prioridá, cuidao que reparar l’eclís ensin protección fayadiza puede causar daños graves na vista. Por esta razón, van desenvolvese campañes educatives en centros escolares, con talleres y materiales específicos a lo llargo del cursu.
La divulgación científica y el turismu astronómicu van ser tamién exes fundamentales del programa. Asina, va cuntar cola collaboración d’entidaes rexonales como’l proyectu Ayande Stars, que la so directora, Lucía González, esplicó güei les claves pa esfrutar del eclís de forma segura y dalguna de les actividaes que van averar l’eventu a la ciudadanía.
Nel actu celebráu na Fidma activóse simbólicamente la cuenta trás pal eclís, que se va producir el 12 d’agostu de 2026 sobro les 20:30 hores, con llixeres variaciones según la localidá. Como xestu inicial, Ciencia, al traviés de la fundación Ficyt, distribuyó abargana de 500 gafes homologaes ente’l públicu del pabellón del Principáu, pa fomentar la observación segura del fenómenu
Asturies, nel focu internacional. L’eclís ufierta xuna oportunidá p’asitiar Asturies como referente na industria espacial. Nesti sentíu, el Principáu va entamar xuna conferencia internacional sobro la nueva yera de la esploración espacial, en collaboración cola Universidá d’Uviéu y so la dirección científica de Noemí Pinilla-Alonso. L’eventu, tituláu Les múltiples víes escontra l’espaciu, va axuntar a más d’un centenar d’especialistes en ciencia, inxeniería y tecnoloxía, representantes institucionales y responsables d’axencies espaciales y empreses del sector.
Ente los ponentes confirmaos destaquen figures de prestíu internacional como Phil Metzger, director del Centru de Microgravedad Stephen W. Hawking; Julia de Llión, investigadora del Institutu d’Astrofísica de Canaries; Francisco Córdova, director d’operaciones de la Estación Espacial Internacional (ISS); Emmanuel Urquieta, vicepresidente de Medicina Aeroespacial na Universidá de Florida Central y Lori Glaze, subdireutora acomuñada de la NASA na área de sistemes d’esploración.
La conferencia va encetar temes como la salú espacial, la defensa planetaria, la robótica y los materiales avanzaos.
