Medría del turismu internacional y del preciu mediu de pernoctación en redolaes urbanes. Anque va ser la próxima selmana cuando la patronal hotelera ufierte los datos concretos d’ocupación d’esti branu, yá adelantren que va raspiar el 90 o 95% nes grandes ciudaes.
Acotense los establecimientos d’Uviéu, Xixón y Avilés que prácticamente colgaron el cartelu de completu, con una medría del turismu internacional y tamién del preciu mediu de pernoctación.
Los hoteles de Xixón tuvieron llenos esti branu. Na ciudá, muncha familia y una medría d’hasta’l 20% en turismu estranxeru.
Resultancies bien positives tamién na zona rural con perspectives de siguir asina hasta ochobre.
Llenos tamién los agospiamientos nun Uviéu que notó una xubida nes tarifes hoteleres y l’aumentu de les conexones aérees internacionales que, con peor tiempu, recibió más visitantes que fueron menos tresnochadores.
Conexones directes que tamién se notaron na contorna d’Avilés, onde la ocupación hotelera tuvo ente’l 90 y el 95%.
El perfil de los visitantes, families y pareyes que permanecieron trés o cuatro díes y visitaron distintos puntos d’Asturies.
La próxima selmana la patronal hotelera va poner sobro la mesa datos más detallaos d’ocupación, anque yá antemanen que van ser probablemente de nuevu cifres de récord.
Prestu n’agospiamientos rurales, con cancelaciones na ruta del Cares poles quemes
Les asociaciones de turismu rural coinciden en que foi un bon branu, de principios de xunetu a finales d’agostu. Ocupaciones ente’l 90 y el 100%, con bien bon tiempu y poques cancelaciones, salvo na zona de la ruta del Cares, poles quemes.
El sector aportuna, sicasí, na importancia de desestacionalizar les visites y apostar pol turismu familiar.
Los empresarios consultaos creen que la crecedera del turismu rural ta siendo lentu, pero sosteníu. Dalgunos, ello ye que ven difícil crecer en places.
Na zona oriental, en Llanes y Ribesella, el sector pide amás regular el turismu de autocaravanas y furgonetes camperizadas que foi creciendo, dicen, dende la pandemia.
El Conceyu de Ribesella va instalar servicios básicos nel aparcamientu del autocine pa 30 autocaravanas, ente que en Llanes ampliaránse les places del parking de 19 a 30.
