El Gobiernu declara zona catastrófica en 16 comunidaes afectaes por emerxencies climátiques. La declaración inclúi les quemes forestales y los hinchentes de los postreros trés meses. El Conseyu de Ministros aprobó güei la declaración de zona catastrófica a los territorios quemaos poles quemes forestales y les árees anubiertes dende’l pasáu 23 de xunu. Nel casu d’Asturies, afecta a los conceyos de Cangas, Somiedu, Degaña y Ibias.
El ministru del Interior, Fernando Grande Marlaska, señaló qu’estes emerxencies, qu’hai cuantificado en 118 (113 d’elles grandes quemes forestales) son la mayor catástrofe de los últimos años y dixo que’l Gobiernu alcordó abrir yá la vía por que los perxudicaos puedan reclamar ayudes que por llei -yos correspuenda.
En concretu, el gabinete que preside Pedro Sánchez, na so primer xunta tres el descansu branizu, aprobó la declaración de zones afectaes por una emerxencia de Protección Civil en 16 de les 17 comunidaes autónomes, para tolos desastres rellacionaos col cambéu climáticu nestos trés últimos meses, tantu quemes forestales como hinchentes.
Marlaska precisó que la declaración nun contien ayudes concretes, pero sí dexa que tolos departamentos competentes empiecen a dictar les ordes y resolvimientos oportunos por que eses zones territoriales que sufrieron la emerxencia puedan recibir la bonificación correspondiente.
Recordó que la llei de Protección Civil, nel so artículu 24, establez qué tipu de midíes de pueden adoptar: por casu, les fiscales correspuenden al Ministeriu de Facienda, que con tolos datos que vaya llogrando de lo que presenten los perxudicaos va dictar los resolvimientos oportunos.
Tamién va poder haber bonificaciones a la Seguridá Social, midíes llabores o sofitu a los daños na agricultura, ente otros.
