- Menos pisos y cada vez más caros pa los universitarios en tol país
Cuasi la metá de los estudiantes yá escueye universidá en función del agospiamientu. El preciu de los pisos y les residencies ye un factor cimeru, según el portal especializáu n’arriendu Life4Life. Les inmobiliaries asturianes afiten que tanto n’Uviéu como en Xixón hai menos pisos y cada vez más caros.
La ufierta de pisos pa estudiantes amenorgó un 2% n’Uviéu según el portal Idealista. Ye una de les capitales de provincia onde los estudiantes cada vez tienen más problemes pa llograr agospiamientu. Y lo mesmo ta socediendo en Xixón, según la Unión d’Inmobiliaries d’Asturies.
Y el motivu ta en qu’a los propietarios sal-yos yá más rentable destinar les sos viviendes solo a usu turísticu.
La Universidá d’Uviéu reconoz que’l problema de la vivienda afecta a los universitarios
El vicerrectoráu d’estudiantes de la Universidá d’Uviéu reconoz que’l problema de la vivienda ta afectando a los universitarios, non solo n’Asturies, sinón en toa España y inclusive n’Europa.
Cada vez hai menos ufierta y la qu’esiste ta a precios escomanaos. Ello esplica que les residencies y colexos mayores tean anguaño al 100% de la so capacidá n’Uviéu. Y la de Mieres supera per primer vegada’l 50% d’ocupación.
Solo l’agospiamientu ronda los 500 euros na residencia. En Mieres, 400.
El 75% de los estudiantes que fai la PAU n’Asturies queda a estudiar nel Principáu
Nin pol prestixu de la universidá, nin pola distancia xeográfica. Cuasi la metá de los mozos deciden en qué universidá estudiar en función de los precios del arriendu. La crisis del mercáu de la vivienda impacta dafechu nes opciones de los estudiantes asturianos, que lo piensen dos vegaes pa salir de la comunidá.
El 75% de los estudiantes que fai la PAU n’Asturies queda a estudiar nel Principáu. Siendo Castiella y Lleón, Madrid y Galicia les comunidaes onde más salen a estudiar. Precisamente, el menor preciu del arriendu de pisos y habitaciones fai d’Asturies un destín universitariu atractivu.
El preciu mediu d’arrendar una habitación n’España ta en 420 euros al mes, con Madrid a la cabeza, con 550 euros.
